Ўзбекистон президентининг 20 август куни бўлиб ўтадиган тадбиркорлар билан очиқ мулоқотига ариза ва мурожаатларни қабул қилиш бошланди. Бу ҳақда Инвестициялар, саноат ва савдо вазирлиги матбуот хизмати хабар берди.
Қайд этилишича, тадбирда минглаб ишбилармонларнинг онлайн ва бевосита тарзда иштирок этиши кутилмоқда. Мулоқот тизимли муаммоларни аниқлаш, уларни ҳал қилиш йўлларини топиш ва Ўзбекистонда тадбиркорликни ривожлантиришни янада рағбатлантиришга ёрдам беради.
Очиқ мулоқотга тайёргарлик кўриш доирасида Инвестициялар, саноат ва савдо вазирлиги томонидан Савдо-саноат палатаси ва бизнес-омбудсман билан ҳамкорликда тадбиркорлар учун Call-марказлари ва таҳлилий штаб фаолияти ташкил этилди.
Бу жараёнга масъул вазирлик ва идоралар жалб этилиб, вилоятларда ҳудудий штаблар ташкил қилинди.
Мурожаатларни 1094 ва 1100 рақамлари ёки ёзма равишда business.gov.uz портали орқали ҳафтасига етти кун, 24 соат давомида йўллаш мумкин. Келиб тушган ҳар бир мурожаатлар инобатга олинади.
Вазирлик хабарида келтирилишича, бу форматдаги мулоқот анъанаси икки йилдан буён давом этиб келаётганига қарамасдан 2021 йилдан бошлаб тадбирларга тайёргарлик доирасида ишбилармонлик муҳитини яхшилаш бўйича 27 мингдан ортиқ мурожаат ва таклифлар келиб тушди. Очиқ ва конструктив таклифлар янги ислоҳотлар дастурини шакллантиришга имкон берди. Бу йил учинчи очиқ мулоқот бўлиб ўтади.
Тадбиркорлар куни
Шавкат Мирзиёев 2021 йилдан бошлаб 20 августни Тадбиркорлар куни этиб белгилаган ва уни ҳар йили кенг нишонлашни таклиф қилган. Ўша йили президентнинг тадбиркорлар билан о′тказган илк очиқ мулоқотида ўн мингга яқин тадбиркор иштирок этганди. 2022 йилда президент қарори билан “Фаол тадбиркор” кўкрак нишони таъсис этилди ва ўша йили 71 нафар тадбиркорга ушбу кўкрак нишони топширилди.
Изоҳ (0)