O‘zbekistonda “Faol tadbirkor” ko‘krak nishoni ta’sis etildi

O‘zbekiston Respublikasi prezidentining qarori bilan “Faol tadbirkor” ko‘krak nishoni ta’sis etildi.

“Faol tadbirkor” ko‘krak nishoni bilan O‘zbekistonda tadbirkorlikni rivojlantirish, ish o‘rinlarini yaratish, innovatsiyalar joriy qilish, soliqlarni o‘z vaqtida to‘lash, mahsulot va xizmatlarni eksport qilish, yetuk mutaxassislar tayyorlash hamda biznesdagi muvaffaqiyatlari va ijtimoiy faolligi bilan barchaga namuna bo‘layotgan tadbirkorlar taqdirlanadi.

“Faol tadbirkor” ko‘krak nishoni har yili 20-avgust – Tadbirkorlar kuni arafasida O‘zbekiston prezidenti yoki uning nomidan O‘zbekiston Oliy Majlisi Senatining raisi, Oliy Majlis Qonunchilik palatasining spikeri, O‘zbekiston Prezidenti administratsiyasi rahbari, O‘zbekiston bosh vaziri, vazirlik, idora va jamoat birlashmalarining respublika organlari rahbarlari, Qoraqalpog‘iston Jo‘qorg‘i Kengesi raisi, viloyatlar va Toshkent shahar hokimlari, shuningdek, bunga vakil qilingan boshqa shaxslar tomonidan tantanali vaziyatda topshiriladi.

“Faol tadbirkor” ko‘krak nishoni bilan taqdirlangan shaxslar haqida har yili “Yilning ilg‘or tadbirkorlari” kitobi chop etib boriladi.

Vazirlar Mahkamasi Savdo-sanoat palatasi bilan birgalikda:

“Faol tadbirkor” ko‘krak nishonlari va ularning guvohnomalari belgilangan tartibda tayyorlanishini;“Faol tadbirkor” ko‘krak nishoni bilan taqdirlangan shaxslar haqida har yili “Yilning ilg‘or tadbirkorlari” kitobi chop etib borilishini ta’minlaydi.Moliya vazirligi har yili “Faol tadbirkor” ko‘krak nishonini berish, uni tayyorlash hamda “Yilning ilg‘or tadbirkorlari” kitobini chop etish bilan bog‘liq sarf-xarajatlar uchun Savdo-sanoat palatasining asoslangan hisob-kitoblariga muvofiq O‘zbekiston Respublikasining respublika budjetidan tegishli mablag‘larni ajratish choralarini ko‘radi.

Mazkur qarorning ijrosini nazorat qilish O‘zbekiston Prezidenti administratsiyasi rahbari S.U. Umurzokov zimmasiga yuklanadi.