O‘zbekistonda 20-avgust – tadbirkorlar kuni. Shu munosabat bilan Toshkent shahrida bir guruh tadbirkorlarni taqdirlash marosimi bo‘lib o‘tdi, deya xabar bermoqda “Daryo” muxbiri.
O‘zbekiston prezidentining “Faol tadbirkor” ko‘krak nishonini ta’sis etish to‘g‘risida”gi qarori va “Faol tadbirkor” ko‘krak nishoni bilan taqdirlash to‘g‘risida”gi farmoyishiga asosan, 71 nafar tadbirkor mazkur nishonlar bilan taqdirlandi.
Tadbirni Investitsiyalar va tashqi savdo vaziri Jamshid Xo‘jayev ochib berdi.
Bu yilgi prezident bilan tadbirkorlar muloqoti 22-avgust kuni o‘tkaziladi. Mazkur tadbirga tayyorgalik ko‘rish jarayonida tadbirkorlardan jami 12 mingdan ortiq murojaatlar kelib tushdi. Ularning asosiy yo‘nalishlari biznesni moliyalashtirish, subsidiya, soliq va yer ajratish masalalarida. Ushbu murojaatlarning 11 ming 450 tasi individual xarakterga ega bo‘lib, shundan 9 ming 390 tasi ijobiy hal qilindi. Qolganlariga tezkorlik bilan yechim topish ishlari olib borilyapti.
Bosh vazir o‘rinbosari, Iqtisodiy taraqqiyot va kambag‘allikni qisqartirish vaziri Jamshid Qo‘chqorov tadbirkorlarga o‘z tabriklarini aytdi.
Elektrni ham, telefonni ham, barcha muhim narsalarni tadbirkorlar kashf qilgan, oldinga qarab fikrlovchilar o‘ylab topgan. O‘zbekistonda 20-avgust –tadbirkorlar bayrami deb e’lon qilingan. O‘ylaymakni, hali tadbirkorlar bir-birini tabriklab, “otkritka”lar yozadi. Bu kun chinakam bayram qilinadi.
Tadbirda Toshkent shahar hokimi Jahongir Ortiqxo‘jayev O‘zbekistonda tadbirkorlarni buyuk kelajak kutayotganini aytdi.
O‘zbekistonda tadbirkorning kelajagi albatta buyuk. Albatta, rivojlanadi. Bunga prezidentimiz barcha sharoitlarni yaratib berganlar. Bizlar bunday imkoniyatlarning qadriga yetishimiz, e’zozlashimiz kerak. Kechasi uyga borib tinch uxlaydigan, birorta tekshiruvdan qo‘rqmaydigan, ‘hali mahsulotlarimni dunyo ko‘radi‘, deb baralla aytadigan kunlar keldi. Toshkent shahar hokimligi tadbirkorlarni har doim qo‘llab-quvvatlashga tayyor.
Tadbirkor Muxlisa Akromova ham ishtirokchilarga tabrik bildirdi.
Biz tadbirkorlarga berilayotgan bunday katta e’tibordan mamnunmiz. Ochig‘i, 20-avgust kuni sizlarda tadbirkorlar uchun katta bayram ekan deb chet ellik hamkorlarizmiz hayron bo‘lishyapti. Bu albatta, insonga g‘urur bag‘ishlaydi. Hozirda bizning korxonamizda 500 nafar ishchi ishlaydi. Yana bir tadbirkor aytyaptiki, uning korxonasida 300 nafar xodim ishlarkan. Ularning ortlarida qancha ayollar bor.
Tadbirkor Nasriddin Rashidovning aytishicha, oldinlari tadbirkorlar O‘zbekistonda joni xatardaligini his qilib, qo‘rqib yashagan.
Bugungi kunlarni juda intiqib kutganmiz. Hayotimizda bunday yaxshi sharoitlar yaratib beriladi deb o‘ylamaganmiz. Avvallari biz tadbirorlar ertayu kech qo‘rqib yashaganmiz. Uydan ofisgacha borguncha ham qo‘raqar edik. Bugun esa erkinmiz. Ichimizdagi dardlarimizni mutasaddi rahbarlarga qo‘rqmasdan ayta olyapmiz, zarur masalalarni muhokoma qilmoqdamiz.
Izoh (0)