O‘zbekistonda o‘tgan olti oyda tez yordamga qancha yolg‘on chaqiriq tushgani ochiqlandi

Sog‘liqni saqlash vazirligi O‘zbekistonda o‘tgan olti oyida tez yordamga qancha yolg‘on chaqiriq tushganini ochiqladi.

Unga ko‘ra, Respublika tez tibbiy yordam markazi direktori Abduvoitjon Gafurov 2023-yilning o‘tgan 6 oyi davomida 103 xizmatiga jami 1752 ta yolg‘on chaqiriq kelib tushganini bildirgan. Mazkur ko‘rsatkich 2022-yilning ayni shu davri bilan taqqoslansa, qariyb 975 taga kamayganini ko‘rish mumkin.

Tahlillar shuni ko‘rsatadiki, 2023-yilning yanvar—iyun oylarida eng ko‘p yolg‘on chaqiriq Toshkent viloyatida kuzatilib, mazkur raqam 325 tani tashkil etdi. Keyingi o‘rinda Farg‘ona viloyati qayd etildi — 284 ta. Shuningdek, Qashqadaryo viloyatidan 248 ta ana shunday murojaat kelib tushgan. Eng kam yolg‘on chaqiriq esa Samarqand viloyatida ro‘yxatga olindi — 17 ta.