Тошкент шаҳар ҳокимининг “Янги Тошкент” лойиҳасини инобатга олган ҳолда пойтахтнинг янги бош режасини ишлаб чиқиш тўғрисидаги қарори қабул қилинди.
Бунда, Тошкент шаҳрининг янги бош режасини ишлаб чиқишда пойтахт ҳокимлиги буюртмачи функциясини бажаради. Буюртмачига Тошкент шаҳрининг янги бош режасини “Янги Тошкент” лойиҳасини инобатга олган ҳолда лойиҳаолди ҳужжатларни тайёрлаш ҳамда хорижий лойиҳа ташкилотини белгилаш учун халқаро танловга олиб чиқишга қадар бўлган тадбирларни амалга оширишда “ТошкентбошпланЛITI” ДУК билан тўғридан тўғри шартнома тузишга рухсат берилган.
Буюртмачи ва “ТошкентбошпланЛITI” ДУК ўртасида расмийлаштириладиган шартнома доирасида, биринчи босқичда Тошкент шаҳар маҳаллий бюджетининг қўшимча манбалари ҳисобидан 40 миллиард сўм ажратилади.
Янги бош режани амалга ошириш бўйича буюртмачи этиб “Ягона буюртмачи хизмати” инжиниринг компанияси белгиланди.
Бош режани тайёрлаш муддати бир неча бор қолдирилган эди
2012 йил ёзида Тошкент шаҳри ва унинг атрофи бош режасининг 2030 йилгача ҳисобланган техник-иқтисодий асослари муҳокама қилингани ҳақида хабар берилган. 2018 йилнинг августидаги президент фармонида пойтахтнинг тасдиқланган бош режаси мавжуд эмаслиги “тартибсиз қурилишларга олиб келмоқда, тадбиркорлик субъектлари фаолиятини янада кенгайтиришга имкон бермаяпти, шунингдек, пойтахтни фаол ижтимоий-иқтисодий ривожлантиришга тўсқинлик қилмоқда”, — дея қайд этилган эди.
Шаҳар ҳокимига 2018 йил 1-октябрга қадар бош режа концепциясининг лойиҳаси ҳамда бош режанинг ўзини ишлаб чиқиш бўйича халқаро танлов ўтказиш топширилган.
2019 йилнинг февраль ойида пойтахт ҳокимининг архитектура, капитал қурилиш ва коммуникацияларни ривожлантириш масалалари бўйича собиқ биринчи ўринбосари Даврон Ҳидоятов (ҳозирги Чирчиқ шаҳар ҳокими) Тошкент шаҳрининг бош режаси концепцияси ўша йилнинг апрелига қадар 3D форматда тайёрланиши ҳақида маълум қилганди. Шунингдек, у лойиҳани яратиш устида Хитой, Туркия ва Буюк Британия компаниялари иш олиб бораётганини қайд этган эди.
Кейинчалик белгиланган муддатлар ортга сурилди — ишлаб чиқишда турк компанияси иштирок этган ҳужжат 2020 йилда тақдим этилиши режалаштирилаётгани маълум қилинди.
Қурилиш вазирининг собиқ биринчи ўринбосари Шерзод Хидоятов (ҳозирги қурилиш ва уй-жой коммунал хўжалиги вазирининг биринчи ўринбосари) 2020 йил декабрь ойида Тошкентнинг бош режасини ишлаб чиқиш 2022 йил охиригача якунланиб, аҳолига тақдим этилиши режалаштирилганини маълум қилди. Ушбу муддат ҳукумат томонидан тасдиқланган муддатга мос келади.
Президентнинг 2020 йил ноябрдаги қарори билан 2025 йилгача Ўзбекистоннинг барча шаҳарлари ва шаҳар посёлкаларининг тўртдан бир қисмини бош режалар билан қамраб олиш белгиланган. Бунда лойиҳа ҳужжатлари жамоатчилик муҳокамаси натижаларини ҳисобга олган ҳолда тасдиқланиши лозим эди.
Шавкат Мирзиёев 2022 йил 18-октябрь куни “ТошкентбошпланЛITI” давлат унитар корхонасига бориб, Тошкент шаҳрининг 2045 йилгача бўлган Бош режаси лойиҳаси билан танишганди. Ўшанда Тошкент шаҳрининг 2045 йилгача бўлган бош режаси лойиҳаси “Янги Тошкент” концепцияси билан мутаносиб тайёрлангани айтилган. Бу янги шаҳар пойтахтнинг шарқий қисмида, Чирчиқ ва Қорасув дарёлари оралиғида барпо этилади. 500 минг аҳолига мўлжалланган бўлади.
2023 йил 16 январь куни президент Тошкент шаҳар ҳокими Жаҳонгир Ортиқхўжаевни ишдан олганди. Йиғилишда давлат раҳбари пойтахтнинг Бош режаси ҳалигача тасдиқланмагани натижасида рухсатсиз қурилган объектлар сони 250 дан ошиб кетгани, қурилишга рухсат берилганда, мавжуд инфратузилмага юклама бўйича аниқ ҳисоб-китоб қилинмаётгани, бозорларда озиқ-овқат музлаб қолмаслиги учун, нарх-наво ошиб кетмаслиги учун чора кўрилмаётгани учун пойтахт мутасаддиларига қатъий эътироз билдирилган эди.
Изоҳ (0)