Toshkent shahrini ko‘kalamzorlashtirish bo‘yicha bosh reja tasdiqlandi

Toshkent shahar Xalq deputatlari kengashining “Toshkent shahrini ko‘kalamzorlashtirish bo‘yicha bosh rejasini tasdiqlash haqida”gi qarori qabul qilindi, deb xabar bermoqda Norma.

Hujjat bilan 2023—2027-yillarda Toshkent shahrini ko‘kalamzorlashtirish bo‘yicha Bosh reja tasdiqlandi, unga ko‘ra har yili:

• 7 millionga yaqin mavsumiy gullar;
• 75 mingdan kam bo‘lmagan miqdorda daraxt ko‘chatlari va butalar ekilishi nazarda tutilmoqda.

Qaror bilan quyidagi vazifalar belgilanmoqda.

• 2024-yilga qadar poytaxtni yashillik darajasini 30 foizga yetkazish;
• ekologiya va atrof-muhitni muhofaza qilish boshqarmasi va tuman hokimliklariga atrof-muhitga ta’siri bo‘yicha I va II toifaga mansub bo‘lgan korxonalarining atmosfera havosini ifloslantiruvchi statsionar manbalarida samaradorligi 95 foizdan past bo‘lmagan chang va gazlarni tutib qoluvchi qurilmalarni o‘rnatilishini nazorat qilishni yuklatish;
• shahar va tumanlar markazlari ko‘chalaridagi irrigatsiya tarmoqlarini xatlovdan o‘tkazib, tarmoqlarni joriy ta’mirlash va yangilash choralarini ko‘rish;
• daraxtlarni zararkunanda hasharotlardan saqlab qolish uchun chet ellik mutaxassislarni jalb etish;
• 2022—2024-yillarda shahardan o‘tadigan kanallarning (62 kilometr qismi) qirg‘oq bo‘ylarini obodonlashtirish, kanallarning qirg‘oqlarini mustahkamlash, ko‘kalamzorlashtirish va sayilgohlar tashkil etish.

Mavzuga doir: “Italiyalik ekspertlar Yevropaning ko‘p shaharlaridan ko‘ra Toshkentda yashillik darajasi baland deb baho berdi” — Ekoqo‘mita raisi Narzullo Oblomurodov