Tarmoqlarda Qashqadaryo viloyatining Koson tumanida hokimlik xodimi tuman Soliq inspeksiyasi inspektorini pichoqlagani aytilgan xabar tarqaldi. Koson tumani hokimligi buni rad etdi.
Maʼlum qilinishicha, tuman hokimligining hech bir xodimi soliq idorasi xodimini pichoqlagani, tan jarohati yetkazgani yo‘q.
“Aslida, Koson tumani soliq inspeksiyasi xodimi Z.J. va u bilan tanish fuqarolar o‘rtasida oilaviy mojaro sabab nizo kelib chiqqan. Xodim tan jarohati olib, tuman tibbiyot birlashmasiga yotqizilgan. Hozirda xodimda tuman tibbiyot birlashmasida davo muolajalari olib borilmoqda”, — deyiladi hokimlik axborotida.
“Daryo” mazkur voqeaga aniqlik kiritish maqsadida viloyat IIB axborot xizmati rahbari Iroda Rasulova bilan ham bog‘landi.
“Mazkur holat yuzasidan Koson tuman IIB tergov bo‘limi tomonidan gumonlanuvchiga nisbatan Jinoyat kodeksining 104-modda 2-qismi (qasddan badanga og‘ir shikast yetkazish) bilan jinoyat ishi qo‘zg‘atilib, gumonlanuvchi qo‘lga olingan. Jabrlanuvchi ayni paytda shifoxonada, shifokorlar nazoratida qolmoqda”, — deydi Iroda Rasulova.
Izoh (0)