Toshkent viloyati hokimi Zoir Mirzayev g‘alladan bo‘shagan maydonlarni yoqib, atrofni zaharlagan fermerlarning g‘alla maydoni olib qo‘yilib, auksionda qayta sotuvga qo‘yilishini maʼlum qildi. Bu haqda viloyat hokimining shaxsiy Telegram-kanalida xabar berilgan.
“G‘alladan bo‘shagan yerlarda somon poyasini yoqish dehqonchilikka katta ziyon yetkazadi. Bu tuproqdagi mikroorganizmlar, foydali hasharotlarni yo‘qotadi, atrof-muhitga katta zarar yetkazadi. Viloyat faollari, qishloq xo‘jaligi sohasi vakillari ishtirokida mana shu holatlar muhokama qilindi. Endilikda yerga bepisand, nohalol munosabatda bo‘lgan har qanday shaxsning yeri davlat tasarrufiga qaytariladi. Bu borada pozitsiyamiz qatʼiy. Yer eng katta boyligimiz va rizq-ro‘zimiz manbai. Uni asrab-avaylash muqaddas burchimiz. O‘z navbatida, shunday holatlarga loqayd bo‘lmay, munosabat bildirayotgan bloger va ijtimoiy tarmoqlar faollariga rahmat aytamiz”, — deydi Zoir Mirzayev mazkur holat haqida xabar berar ekan.
Toshkent viloyati hokimligi viloyat rahbarining masʼullar bilan yig‘ilish muhokamasi videosini eʼlon qildi.
“Kecha internetda yozishyapti, tutundan nafas olib bo‘lmayapti deb. Toshkent shahrida g‘alla yo‘q-ku, g‘alla shahar atrofida, Toshkent viloyati hududida-ku. Biz atrofni zaharlayotgan bo‘lsak, zaharlagan odam nega javob bermaydi? Odamlarni astma qilyapti, boshqa kasalliklarni chiqaryapti. Bunga nima haqqi bor uning, bunday odamlar nega fermer bo‘lishi kerak?”, — deydi viloyat hokimi Zoir Mirzayev.
Zoir Mirzayevning aytishicha, yerini yoqqan fermer katta ehtimol bilan uni sotib olgan.
“Kattakonlarning fermeri qiladi, yerni sotib olgan yoqib yuborgan. Qachongacha kimningdir orqasida turgan odamga biz andisha qilishimiz kerak?”, — deydi u.
Toshkent hokimi bir fuqaroga 70-80 gektar yetarli ekanini, 300 gektarlab yeri bor fermerlarning ortiqcha yeri olinib, oddiy odamlarga berilishi kerakligini aytadi.
“Bir odamga ko‘pi bilan 70-80 gektar yer, qolganini qaytarib bersin, oddiy xalqqa ham berish kerak. Eplolmayapti-ku. Pilla boqmasa vallomatlar, palonchi-pistonchining qarindoshi. G‘allani bajarmasa, Oqqo‘rg‘on viloyat oyog‘iga kishan bo‘ldi. Pilla ham bo‘lmadi, g‘alla ham bo‘lmadi. Nimaga klaster bilan yuribmiz haligacha? Klaster rahbarining qorni to‘q, uyi bor qo‘sha-qo‘sha, bunday bo‘lgach, xalqni o‘ylaydimi? Ertaga Oqqo‘rg‘onning xalqiga kim bir hovuch g‘alla beradi?”, — deydi Zoir Mirzayev.
Viloyat hokimi yerini yoqqan fermerlarning yeri qaytarib olinishi kerakligini, auksionda savdoga qo‘yilishi lozimligini aytib, shanba kuni yerini qaytarib bergan fermerlar iqrorini eshitmoqchiligini qo‘shimcha qildi.
Izoh (0)