Toshkentda DXXning sobiq binosini buzish boshlandi, uning o‘rniga mehmonxona quriladi. Bu haqda O‘zbekiston otelyerlar assotsiatsiyasi xabar berdi.
Ma’lum qilinishicha, Radisson Hotel Group kompaniyasi Metropol Group tashkiloti bilan premium-klassga kiruvchi 164 ta xonaga ega mehmonxonani qurish bo‘yicha shartnomani imzolagan. Mehmonxonani 2026-yilgacha qurib bitkazish rejalashtirilgan.
“Radisson Collection Hotel, Tashkent mehmonxona majmuasi yagona meʼmoriy uslubda loyihalashtirilgan to‘rtta binodan iborat ansambl tarkibiga kiradi. Maydoni 130 ming kvadrat metrga yaqin bo‘lib, mintaqadagi eng yirik majmualardan biriga aylanadigan kompleks jamoat joylari, savdo maydonchalari, kinoteatr, ofislar, koshonalar va ko‘p qavatli yerosti avtoturargohlarini o‘z ichiga oladi”, — deyiladi xabarda.
Majmuaning asosiy va eng baland binosi Radisson Collection Hotel, Tashkent bo‘ladi. 22 qavatli bino 27 ming kvadrat metrdan ortiq maydonni egallaydi. Mehmonxonada, shuningdek, restoran, lobbi-bar, VIP-mehmonxona o‘rin oladi. Bitta qavat basseynga ega spa uchun ajratiladi.
Davlat xavfsizlik xizmati (DXX)ning Toshkentdagi Sayilgoh ko‘chasida joylashgan sobiq markaziy binosi hududi xususiy sektorga sotilishi haqida 2020-yilning oktabrida xabar berilgan edi. 2021-yilning may oyida uni sotib olish bo‘yicha 3 ta taklif kelib tushgani ma’lum bo‘lgandi.
Yer uchastkasining umumiy maydoni 2,2 gektar, bino va inshootlarning maydoni 40 243 kvadrat metr, bino maydoni — 9 376 kvadrat metr, kommunikatsiya tarmoqlari (suv, gaz, elektr, issiqlik) mavjud. Sobiq “Markaziy bino” 2021-yil iyunda 210 milliard so‘m sotib olish narxi bilan Metropol Group MChJga sotilgan.
Izoh (0)