Germaniyaning ixtisoslashgan Fruchtportal yangiliklar portalida “Turkiya O‘zbekistondan olxo‘ri, piyoz va no‘xat importi bo‘yicha bojlarni bekor qildi” sarlavhali maqola eʼlon qilindi.
Qayd etilishicha, Turkiya va O‘zbekiston o‘rtasida imzolangan imtiyozli savdo shartnomasi doirasida O‘zbekistondan bir qator tovarlarni olib kirishda bojxona to‘lovlari bekor qilingan.
Turkiyaning “Rasmiy gazeta”sida (T.C. Resmî Gazete) tarqatilgan axborotga tayangan holda taʼkidlanishicha, Turkiya va O‘zbekiston o‘rtasida imzolangan imtiyozli savdo bitimi doirasida O‘zbekistondan bir qator tovarlarni olib kirishda qo‘llaniladigan tarif kvotalari tartibga solingan.
Xususan, hujjatda piyoz, no‘xat va olxo‘ri kabi O‘zbekiston mahsulotlariga bojlar bekor qilinishi ko‘zda tutilgan. “Ko‘rib chiqilayotgan tarif kvotalari doirasida ushbu mahsulotlarga bojxona boji nolga tushiriladi. Bu haqdagi tegishli qaror va buyruq 2023-yilning 1-iyulidan kuchga kiradi”, — deb yozadi Germaniya axborot manbasi.
Fevral oyida “Xalqaro shartnomani tasdiqlash to‘g‘risida”gi prezident qarori qabul qilingandi. Qarorga muvofiq, O‘zbekiston bilan Turkiya o‘rtasida imtiyozli savdo to‘g‘risida bitim tasdiqlangan. Mazkur bitim 2022-yil 29-mart kuni Toshkent shahrida imzolangan edi.
2022-yil avgustiga ko‘ra, ikki mamlakat o‘rtasida so‘nggi besh yil ichida o‘zaro savdo hajmi ikki baravar o‘sgan va 2021-yilda 3,4 milliard dollarga yetgan. O‘zbekiston—Turkiya tovar ayirboshlash hajmini 2023-yilda 5 milliard dollarga, yaqin istiqbolda esa 10 milliard dollarga yetkazish maqsadida ushbu yo‘nalishdagi hamkorlikni davom ettirish bildirilgandi.
Izoh (0)