Davlat xavfsizlik xizmatining Toshkentdagi Sayilgoh ko‘chasida joylashgan sobiq markaziy binosi hududi xususiy sektorga sotiladi. Bu haqda O‘zbekiston Prezidentining “Davlat ishtirokidagi korxonalarni isloh qilishni jadallashtirish hamda davlat aktivlarini xususiylashtirishga oid chora-tadbirlar to‘g‘risida”gi farmonida so‘z boradi, deb xabar beradi Spot.

Foto: Spot / “Yandeks.Xarita”

Gap xalq tilida “Brodvey” deb ataluvchi poytaxt markazida joylashgan bino haqida ketmoqda. U xususiy sektorga sotiladigan davlatga tegishli ko‘chmas mulk obyektlari ro‘yxatiga kiritilgan. Hozirda umumiy maydoni 20 219 kvadrat metrga teng obyekt Davlat aktivlarini boshqarish agentligi balansida turibdi.

Bundan tashqari, Buxoro va Nuroniylar ko‘chasi kesishmasida joylashgan “Gazetniy korpus” binosining bir qismi (19,1 ming kvadrat metr) hamda Toshkent markazida joylashgan Sverdlov nomidagi sobiq teatr xususiylashtiriladi.

Foto: Spot / “Yandeks.Xarita”

Avvalroq Toshkentning Amir Temur xiyoboni, Buxoro va Nuroniylar ko‘chalari oralig‘ida joylashgan gazetalar ishlab chiqarish majmuasi binosi qismi hamda Buxoro ko‘chasi, 10-uy manzilidagi sobiq Sverdlov nomidagi konsert zali (birja binosi) asosiy faoliyat turi makaron mahsulotlari va shunga o‘xshash unli mahsulotlar ishlab chiqarish bo‘lgan Forsa Barsa kompaniyasiga tanlovsiz, to‘g‘ridan to‘g‘ri nol qiymatda taqdim etilayotgani haqida xabarlar tarqalgandi. Keyinroq davlat aktivlarini boshqarish agentligi bu xabarlar asossiz ekanligini ma’lum qilgan.