Yirik ko‘chmas mulk obyektlarini xususiylashtirish jarayonlari bo‘yicha Davlat tender komissiyasining qarori qabul qilindi. Bu haqda Davlat aktivlarini boshqarish agentligi matbuot xizmati xabar berdi.
Unga ko‘ra Toshkent shahri Sayilgoh ko‘chasi manzilida joylashgan sobiq “Markaziy bino” 210 milliard so‘m sotib olish narxi bilan Metropol Group MChJga sotilgan.
“Gazeta.uz”ning yozishicha, yer uchastkasining umumiy maydoni 2,2 gektar, bino va inshootlarning maydoni 40 243 kvadrat metr, bino maydoni — 9376 kvadrat metr, kommunikatsiya tarmoqlari (suv, gaz, elektr, issiqlik) mavjud.
Mazkur obyektdan kelgusida ofis, savdo, savdo-ko‘ngilochar, madaniy-xordiq, sport, turistik va boshqa xizmatlar ko‘rsatish faoliyati yo‘nalishlaridan biri yoki bir nechtasini amalga oshirilishi talab etilishi ko‘zda tutilgan.Fevral oyi oxirida poytaxtda Toshkent amaliy fanlar universiteti va Diplomat university ochilishi kutilayotgani va ularni bir necha yilga barcha turdagi soliqlardan ozod qilish mumkinligi ma’lum bo‘lgan edi. Birinchi universitet Yunusobod tumanida, ikkinchisi Mirobodda (taxminan, Davlat xavfsizlik xizmatining sobiq binosida) joylashgan bo‘lishi kerak.
Metropol Group kompaniyasi haqida
KTYaDR ma’lumotlariga ko‘ra, Metropol Group 2021-yil 23-fevralda Toshkent shahrida ro‘yxatdan o‘tgan. Ko‘rsatilgan asosiy faoliyat — tijorat faoliyati va menejment bo‘yicha konsalting. Ta’sischisi — Doniyor Abdulazizovich Komilov, rahbari — Yakushevich Georgiy Igorevich.
Ta’kidlanishicha, Doniyor Abdulazizovich Komilov — O‘zbekiston tashqi ishlar vaziri Abdulaziz Komilovning o‘g‘li.
Rusprofile ma’lumotlariga asosan, Doniyor Komilov Rossiyada “Selena” va KTS kompaniyalari ta’sischilariga kiradi. “Kommersant” 2010−2014-yillarda u “Gazprombank” — ZAO tuzilmasidagi “Upravlyayushaya kompaniya — Strategicheskiye aktivi”ni boshqargani haqida yozgan.
Eslatib o‘tamiz, Davlat xavfsizlik xizmati (DXX)ning Toshkentdagi Sayilgoh ko‘chasida joylashgan sobiq markaziy binosi hududi xususiy sektorga sotilishi haqida 2020-yilning oktabrida xabar berilgan edi. 2021-yilning may oyida uni sotib olish bo‘yicha 3 ta taklif kelib tushgani ma’lum bo‘lgandi.
Izoh (0)