Тошкентдаги ДХХнинг собиқ биноси ўрнида меҳмонхона қурилади

Тошкентда ДХХнинг собиқ биносини бузиш бошланди, унинг ўрнига меҳмонхона қурилади. Бу ҳақда Ўзбекистон отельерлар ассоциацияси хабар берди.

Маълум қилинишича, Radisson Hotel Group компанияси Metropol Group ташкилоти билан премиум-классга кирувчи 164 та хонага эга меҳмонхонани қуриш бўйича шартномани имзолаган. Меҳмонхонани 2026 йилгача қуриб битказиш режалаштирилган.

“Radisson Cоllection Hotel, Tashkent меҳмонхона мажмуаси ягона меъморий услубда лойиҳалаштирилган тўртта бинодан иборат ансамбл таркибига киради. Майдони 130 минг квадрат метрга яқин бўлиб, минтақадаги энг йирик мажмуалардан бирига айланадиган комплекс жамоат жойлари, савдо майдончалари, кинотеатр, офислар, кошоналар ва кўп қаватли ерости автотураргоҳларини ўз ичига олади”, — дейилади хабарда.

Мажмуанинг асосий ва энг баланд биноси Radisson Cоllection Hotel, Tashkent бўлади. 22 қаватли бино 27 минг квадрат метрдан ортиқ майдонни эгаллайди. Меҳмонхонада, шунингдек, ресторан, лобби-бар, VIP-меҳмонхона ўрин олади. Битта қават бассейнга эга спа учун ажратилади.  

Давлат хавфсизлик хизмати (ДХХ)нинг Тошкентдаги Сайилгоҳ кўчасида жойлашган собиқ марказий биноси ҳудуди хусусий секторга сотилиши ҳақида 2020 йилнинг октябрида хабар берилган эди. 2021 йилнинг май ойида уни сотиб олиш бўйича 3 та таклиф келиб тушгани маълум бўлганди. 

Ер участкасининг умумий майдони 2,2 гектар, бино ва иншоотларнинг майдони 40 243 квадрат метр, бино майдони — 9 376 квадрат метр, коммуникация тармоқлари (сув, газ, электр, иссиқлик) мавжуд. Собиқ “Марказий бино” 2021 йил июнда 210 миллиард сўм сотиб олиш нархи билан Metropol Group МЧЖга сотилган.