“Maʼmuriy islohotlar doirasida oliy taʼlim, fan va innovatsiyalar sohasida davlat boshqaruvini samarali tashkil qilish chora-tadbirlari to‘g‘risida”gi prezident qarori qabul qilindi. Bu haqda Telegram’dagi “Huquqiy axborot” kanali xabar berdi.
Qarorga ko‘ra, 2023/2024 o‘quv yilidan akademik litseylarga o‘quvchilarni qabul qilishda yozma imtihon asosida dastlabki saralash bosqichi bekor qilinadi. Shuningdek:
- kollej va texnikumlarning taʼlim dasturlariga davlat granti asosidagi qabul ko‘rsatkichlari 2 baravarga oshiriladi;
- abituriyentlarga “davlat granti” yoki “taʼlim yo‘nalishi” ustuvorliklaridan birini tanlash va tanlagan ustuvorligi bo‘yicha bakalavriat taʼlim yo‘nalishlari ketma-ketligida tanlovda ishtirok etish huquqi beriladi;
- talabaning taʼlim yo‘nalishiga mos startap loyihasi hamda ratsionalizatorlik g‘oyasini bitiruv malakaviy ishi va magistrlik dissertatsiyasi sifatida himoya qilish amaliyoti joriy etiladi;
- oliy taʼlim muassasalari talabalarining iqtisodiyot tarmoqlari korxonalarida haq to‘lanadigan qisqa muddatli maqsadli ishlab chiqarish amaliyotlari tashkil etiladi.
Yanvar o‘rtalarida O‘zbekistondagi barcha OTM, texnikum va akademik litseylarning o‘qish boshlashga tayyorligi holati qayta monitoring qilinayotgani to‘g‘risida xabar berilgandi. Fevralda esa O‘zbekistonda endi o‘quvchilar kollej va texnikumlarga bir yilda ikki marta qabul qilinishi aytilgan edi.
Ta’kidlash kerakki, 2022/2023-o‘quv yili uchun professional ta’lim muassasalariga sirtqi, kechki va dual ta’lim shakllari bo‘yicha ro‘yxatdan o‘tgan abituriyentlar test sinovida ishtirok etmagan. Ular professional ta’lim muassasalari (kollej va texnikum)ga kirish imtihonlarisiz to‘lov-kontrakt asosida qabul qilinadi.
Izoh (0)