“Inson rivojlanishi, yuksak marralarga yetishi uchun komfort zonadan chiqishi kerak” — Italiyada tahsil olayotgan “El-yurt umidi” jamg‘armasi stipendiati

So‘nggi yillarda turli xorij mamlakatlari, xususan, Italiyada tahsil olayotgan o‘zbekistonliklar ko‘payib bormoqda. Albatta, bu — Italiya va O‘zbekiston o‘rtasidagi ko‘plab sohalar qatori, ta’lim sohasidagi hamkorlik rivojlanayotganidan darakdir. 

Abdulfattoh Shokirov bir necha yil davomida O‘zbekistonda adliya tizimida faoliyat olib borgan. U bugungi kunda Rim shahridagi Sapiensa universitetida magistratura bosqichida tahsil olmoqda. Abdulfattoh “El-yurt umidi” jamg‘armasining stipendiati hisoblanadi. 

“Daryo” muxbiri Abdulfattoh Shokirov bilan xorijda o‘qish, Italiya ta’limi va kelgusidagi rejalari xususida suhbatlashdi.

“Yoshligimdan ta’limning turli sohalariga qiziqqanman. Masalan, matematika, shaxmat, ya’ni aniq fanlarga. 12 yoshlarimdan esa yurisprudensiyaga qiziqishim ortgan. Shundan so‘ng 2010-yildan 2013-yilgacha Toshkent yuridik kasb-hunar kollejiga o‘qishga kirganman. O‘qish davrida hujjatlar bilan ishlashga qiziqishim ortgan. 

2013-yili esa Toshkent davlat yuridik universitetiga o‘qishga qabul qilindim. Ham o‘zbek, ham rus guruhlarida o‘qidim va hujjatlar bilan ishlashni, qonun hujjatlarini ikkita tilda yozishni o‘rgandim. 2017-yil dekabrdan boshlab adliya tizimida faoliyatimni boshladim. 

Institutda ta’lim olayotganimda va ish faoliyatini boshlagan vaqtlarimda xorijda magistraturani o‘qish orzuim bo‘lgan. Bu borada ingliz tilini o‘rganishni yanada kuchaytirdim. Ish jarayonida kerakli imtihonlarni topshirib Italiyaning Rim shahridagi Sapiensa universiteti, huquqshunoslik yo‘nalishiga o‘qishga qabul qilindim. 

“El-yurt umidi” jamg‘armasining stipendiya dasturida qatnashib ko‘rdim. Turli bosqichlardan o‘tgach “stipendiat” deb topildim. Bu menga chet elga kelib qiynalmasdan, qo‘shimcha imkoniyatlarni o‘ylamasdan, faqat ta’limni o‘ylab o‘qish imkonini berdi. Faqat o‘qib, O‘zbekistonga yangicha fikrlashni, yangicha takliflarni olib kelish mas’uliyati bor. 

Inson rivojlanishi uchun, yuksak marralarga yetishi uchun komfort zonadan chiqishi kerak. Shuning uchun o‘zimizga yangi marra sifatida magistraturani ko‘rdim. Ota-onam ham boshida “u yerga borsang, qiynalmaysanmi”, deyishgan. Lekin ish tajribam, fond barcha narsani ta’minlashgani uchun qarshiliklar bo‘lmadi. 

O‘qishga ketayotganimda ham bevosita O‘zbekistonga qaytib, bu yerda olingan bilimlarni u yerda ishlatish umidi bilan kelganman”.

To‘liq intervyuni “Daryo”ning YouTube sahifasi orqali tomosha qilishingiz mumkin: