Toshkent viloyati Olmaliq shahrida 14 yoshli bolaning boshi simyog‘ochga kirib qoldi. Bu haqda Favqulodda vaziyatlar vazirligi xabar berdi.
Ma’lum qilinishicha, 9-iyun kuni soat 16:54 da viloyat FVBga 14 yoshli bola To‘maris ko‘chasi bo‘ylab velosipedda harakatlanib ketayotgan vaqtda boshqaruvni yo‘qotib, yo‘l chetiga o‘rnatilgan beton elektr tayanchiga urilgani va tayanchdagi teshikka boshi kirib qolgani to‘g‘risida xabar kelib tushgan.
Zudlik bilan aytilgan manzilga FVV qutqaruvchilari yetib borib, maxsus asbob-anjomlar yordamida bolaga amaliy yordam ko‘rsatilgan va tez-tibbiy yordam xodimlariga topshirilgan. “Bolaning ahvoli yaxshi”, — deyiladi xabarda.
FVV tomonidan qutqarilgan bolalar
2020-yilda Nukusda taqiqlangan joyda cho‘milib, suvda cho‘kayotgan bola qutqarilgan, biroq bola bilan birga cho‘milgan mast erkak oqib ketgandi. 2022-yil iyunda Qashqadaryo viloyatining Chiroqchi tumanida artizan qudug‘iga tushib ketgan bola qutqarilgan edi. Shuningdek, Farg‘ona shahridagi ko‘p qavatli uylarning birida xonadon eshigi qulflanib qolishi oqibatida ichkarida yolg‘iz qolgan ikki nafar bola, shu yilning may oyida esa Namanganda ikki va uch yoshli bola yong‘indan qutqarilgandi.
Izoh (0)