O‘zbekistonning rasmiy zaxira aktivlari may oyida 837,9 million dollarga kamayib, 2023-yil 1-iyun holatiga ko‘ra, 34,37 milliard dollarni tashkil etmoqda. Bu haqda Markaziy bank xabar berdi. Zaxiralar ketma-ket ikkinchi oy kamaymoqda.
Ma’lum qilinishicha, mamlakatdagi oltin zaxirasi 980,6 milliard dollarga kamayib, 23,2 milliard dollarni tashkil etmoqda. Qimmatbaho metallning hajmi 0,3 million troy unsiyaga (9,3 tonna) kamayib, 11,9 million troy unsiyasini (taxminan 370,1 tonna) tashkil etdi.
Shu bilan birga, may oyida oltin kotirovkasi ham biroz pasaydi — unsiyasi uchun 2 034 dan 1987,3 dollargacha.
O‘zbekiston o‘tgan yanvar—aprel oylarida 3 mlrd dollardan ortiq oltin eksport qilgan. Aprel oyida O‘zbekiston oltin eksportini 650 million dollargacha qisqartirdi. Xorijga qimmatbaho metall yetkazib berishning umumiy hajmi 3,06 milliard dollarni tashkil etdi.
Oltin zaxiralari nima uchun kerak?
Oddiy til bilan aytganda, bu sug‘urta, davlatning “xavfsizlik yostig‘i”. Zaxiralar dunyoning deyarli barcha mamlakatlarida favqulodda vaziyatlar uchun mavjud.
Zaxiralar, odatda, yuqori likvidli ya’ni tez sotiladigan aktivlarda saqlanadi. Oltin va xorijiy valyuta ushbu talablarga javob beradi — ulardan istalgan vaqtda qarz to‘lash yoki investitsiyalar uchun foydalanish mumkin.
2017-yilgacha O‘zbekiston zaxiralari to‘g‘risidagi ma’lumotlar jamoatchilikka e’lon qilinmas edi. O‘sha yilning noyabr oyida zaxiralar 26 milliardni tashkil etishi ma’lum bo‘lgan.
Izoh (0)