Сўнгги йилларда турли хориж мамлакатлари, хусусан, Италияда таҳсил олаётган ўзбекистонликлар кўпайиб бормоқда. Албатта, бу — Италия ва Ўзбекистон ўртасидаги кўплаб соҳалар қатори, таълим соҳасидаги ҳамкорлик ривожланаётганидан даракдир.
Абдулфаттоҳ Шокиров бир неча йил давомида Ўзбекистонда адлия тизимида фаолият олиб борган. У бугунги кунда Рим шаҳридаги Sapiensа университетида магистратура босқичида таҳсил олмоқда. Абдулфаттоҳ “Эл-юрт умиди” жамғармасининг стипендиати ҳисобланади.
“Дарё” мухбири Абдулфаттоҳ Шокиров билан хорижда ўқиш, Италия таълими ва келгусидаги режалари хусусида суҳбатлашди.
“Ёшлигимдан таълимнинг турли соҳаларига қизиққанман. Масалан, математика, шахмат, яъни аниқ фанларга. 12 ёшларимдан эса юриспруденсияга қизиқишим ортган. Шундан сўнг 2010 йилдан 2013 йилгача Тошкент юридик касб-ҳунар коллежига ўқишга кирганман. Ўқиш даврида ҳужжатлар билан ишлашга қизиқишим ортган.
2013 йили эса Тошкент давлат юридик университетига ўқишга қабул қилиндим. Ҳам ўзбек, ҳам рус гуруҳларида ўқидим ва ҳужжатлар билан ишлашни, қонун ҳужжатларини иккита тилда ёзишни ўргандим. 2017 йил декабрдан бошлаб адлия тизимида фаолиятимни бошладим.
Институтда таълим олаётганимда ва иш фаолиятини бошлаган вақтларимда хорижда магистратурани ўқиш орзуим бўлган. Бу борада инглиз тилини ўрганишни янада кучайтирдим. Иш жараёнида керакли имтиҳонларни топшириб Италиянинг Рим шаҳридаги Sapiensа университети, ҳуқуқшунослик йўналишига ўқишга қабул қилиндим.
“Эл-юрт умиди” жамғармасининг стипендия дастурида қатнашиб кўрдим. Турли босқичлардан ўтгач “стипендиат” деб топилдим. Бу менга чет элга келиб қийналмасдан, қўшимча имкониятларни ўйламасдан, фақат таълимни ўйлаб ўқиш имконини берди. Фақат ўқиб, Ўзбекистонга янгича фикрлашни, янгича таклифларни олиб келиш масъулияти бор.
Инсон ривожланиши учун, юксак марраларга етиши учун комфорт зонадан чиқиши керак. Шунинг учун ўзимизга янги марра сифатида магистратурани кўрдим. Ота-онам ҳам бошида “у ерга борсанг, қийналмайсанми”, дейишган. Лекин иш тажрибам, фонд барча нарсани таъминлашгани учун қаршиликлар бўлмади.
Ўқишга кетаётганимда ҳам бевосита Ўзбекистонга қайтиб, бу ерда олинган билимларни у ерда ишлатиш умиди билан келганман”.
Тўлиқ интервьюни “Дарё”нинг YouTube саҳифаси орқали томоша қилишингиз мумкин:
Изоҳ (0)