Toshkent shahri Chilonzor tumanida 21 yoshli yigit tergovdan qochish maqsadida hojatxonadan pastga sakrab, vafot etgani to‘g‘risida xabar berilgandi. Bosh prokuratura matbuot kotibining ma’lum qilishicha, holat yuzasidan jinoyat ishi qo‘zg‘atilgan.

“Chilonzorda 21 yoshli yigitning o‘limi bilan bog‘liq holat yuzasidan Jinoyat kodeksining 208-moddasi (hokimiyat harakatsizligi) bilan jinoyat ishi qo‘zg‘atildi”, — deyiladi xabarda.

Fuqaro X.T. cho‘ntagida “gashish” giyohvandlik vositasini saqlab kelganligi aniqlanib, 22-may kuni Chilonzor tumani IIO FMB JQB giyohvandlikka qarshi kurashish bo‘limiga olib kelingan.

Binoning 4-qavatiga surishtiruv harakatlarini o‘tkazish uchun olib chiqilgan X.T. javobgarlikdan qochish maqsadida shu qavatda joylashgan hojatxonaga kirib, tezkor xodimning chalg‘ishi natijasida hojatxonaning derazasidan, pastda joylashgan oshxonaning shifer bilan qoplangan tom qismiga sakragan. Shiferning chetki qismi sinishi oqibatida X.T. bosh qismi bilan yerning beton qoplamasiga qulab tushgan.

Jarohatlangan fuqaro ichki ishlar organlari xodimlari tomonidan shifoxonaga olib borilgan. X.T.ga ko‘rsatilgan tibbiy yordamga qaramasdan, olgan tan jarohatlari oqibatida, 29-may kuni shifoxonada vafot etgan.

Bosh prokuratura holat bo‘yicha tarqalgan mish-mishlardan kelib chiqqan asossiz ma’lumotlarga ishonmaslikni so‘rab, yigitning o‘limiga oid qo‘shimcha ma’lumotlar hamda foto-video dalillarni e’lon qilgandi.

Tergovdagi qiynoqlar

5-iyun kuni Toshkent viloyati Bo‘ka tumanida tergovga jalb qilingan fuqaro shifoxonada vafot etgani to‘g‘risida xabar berilgandi. Holat yuzasidan Jinoyat kodeksining 235-moddasi (qiynoqqa solish va boshqa shafqatsiz, g‘ayriinsoniy yoki qadr-qimmatni kamsituvchi muomala hamda jazo turlarini qo‘llash) bilan jinoyat ishi qo‘zg‘atilgan. Voqeaga aloqador bo‘lgan 2 nafar tezkor xodim hibsga olindi. Tergov harakatlari davom etmoqda.

“Hozirda ijtimoiy tarmoqlarda ushbu holat yuzasidan turli asoslanmagan maʼlumotlar tarqalmoqda. Mazkur holat viloyat prokuraturasi tomonidan alohida nazoratga olingan bo‘lib, tergovni chalg‘ituvchi, mish-mishlardan kelib chiqqan asossiz maʼlumotlarga ishonmasliklaringizni hamda rasmiy manbalar orqali berilayotgan maʼlumotlarga tayanishingizni so‘rab qolamiz”, — deyiladi Toshkent viloyati prokuraturasi bayonotida.

O‘z navbatida Oliy Majlisning Inson huquqlari bo‘yicha vakili so‘nggi paytlarda ijtimoiy tarmoqlar orqali surishtiruv va tergov jarayonlarida yoki jazoni ijro etish muassasalarida fuqarolarga jismoniy va ruhiy bosim o‘tkazish, qiynoqqa solishga oid qator xabarlar tarqalib, keng jamoatchilik eʼtirozlariga sabab bo‘layotganiga munosabat bildirdi.