Toshkent viloyatining Toshkent tumanida kadastr hujjatlarini rasmiylashtirib berish uchun pul so‘ragan shaxs qo‘lga olindi, deb xabar beradi Bosh prokuratura huzuridagi departament.
Qayd etilishicha, departamentning Toshkent tuman bo‘limi tomonidan DXX va IIB xodimlari bilan hamkorlikda tezkor tadbir o‘tkazilgan. Tadbirda B.N. ismli shaxs fuqaro X.I.ning 2 ta uy-joyi kadastr hujjatlarini tanishlari orqali rasmiylashtirib berishi evaziga 700 AQSH dollarini olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Kuni kecha Samarqand shahrida kadastr xodimi 1 000 dollar pora bilan qo‘lga olingani to‘g‘risida xabar berilgandi. Shuningdek, Namanganda kutubxona qurish uchun ajratilgan yerni 35 ming dollarga sotishga uringan deputat qo‘lga olingani, Qashqadaryoda hokimlik kotibi 3 mln so‘m pora bilan qo‘lga tushgani to‘g‘risida xabar berilgandi.
Noqonuniy yer savdolari
Aprel boshlarida Navoiyda 80 gektar yerni 1 milliard so‘mga sotishga uringan shaxslar qo‘lga olingani, Samarqand va Farg‘onada noqonuniy yer sotish holatlariga chek qo‘yilgani to‘g‘risida xabar berilgandi. Shuningdek, Qoraqalpog‘iston Respublikasi va Buxoro viloyatida yer maydonlari savdosi bilan bog‘liq firibgarlik holatlari fosh etilgan edi.
Izoh (0)