Oq qumli plyajlar, flora va boy suvosti faunasi bilan ajralib turuvchi, orolning o‘zgacha go‘zalligini, tinch dam olish va suvosti sportini sevuvchilar uchun ajoyib maskan sifatida Tailandning Pxuket va Krabi orollarini misol qilishimiz mumkin.

Tailandning Pxuket va Krabi orollarining eng ekzotik maskanlari va diqqatga sazovor manzillarida 27-may—1-iyun kunlari media tur tashkil qilindi.

Bu yerning tabiati, ekzotik daraxtlari va tiniq dengiz sohillari, koral va rifli dengiz sayyohlarni jalb qiladi. Asosan, Pxuket rusiyzabon turistlar orasida mashhurligi uchun u yerda rus tilida so‘zlashuvchi kam sonli aholini uchratish mumkin va barcha savollaringizga javob topa olasiz.

Aholi qatlamini ingliz, xitoy, koreys va kam sonli rus tilida so‘zlashuvchilar tashkil qilsa-da, u yerda turli millat vakillarini uchratasiz.

Tailand haqida qisqacha

Tailand — Janubi-Sharqiy Osiyoda, Hindixitoy yarimorolining markaziy qismi va Malakka yarimorolining shimoliy qismida joylashgan davlat hisoblanadi. Maydoni 514 ming km². Aholisi 65,4 mln kishi. Poytaxti — Bangkok shahri. Maʼmuriy jihatdan 76 viloyat (“changvad”)ga bo‘linadi.

Media tur Pxuket aeroportiga qo‘nish va sprinterda orol bo‘ylab manzilga yo‘l olishdan boshlandi. Dastur bo‘yicha bir nechta orol va diqqatga sazovor manzillar tanlangan. Pxuket orolining uzunligi 50 km, kengligi esa atigi 21 km. Pxuket sohillari Hind okeanining Andaman dengizi tomonidan yuviladi.

Dam olish maskani tanlashda shubhasiz foydali bo'lgan muhim faktlar:

• Bepul kirish. Orolda bironta xususiy plyaj yo'q, shuning uchun siz har qanday, hatto eng yaqin mehmonxonaning yo'li bo‘ylab joylashgan qirg‘oqni tanlashingiz mumkin.
• Barcha eng yaxshi plyajlar. Pxuketning g‘arbiy tomonida joylashgan, muvaffaqiyatli dam olish uchun barcha zarur infratuzilma mavjud.
• Dam olish narxi. Bu faqat sayyohning imkoniyatlariga bog‘liq. Kuniga 3 000 battdan (1 million so‘m) qimmatga tushadigan mehmonxonalar ham mavjud. Lekin oroldagi barcha mehmonxonalar derazasi go‘zal qirg‘oq manzarasiga ochiladi.

Krabi oroli 

Sayyohlar uchun qiziq bo‘lgan yana bir nuqta — Krabi oroli bo‘lib, Pxuketdan 2 soatlik manzil hisoblanadi.

Bu orolda 1999-yildan beri xalqaro aeroport mavjud bo‘lib, u yerga O‘zbekiston—Dubay—Pxuket marshruti bo‘yicha sayohat qilishingiz mumkin. Orol jami 359,61 kishi yashaydigan sakkizta tumanga bo‘lingan.

Bu tog'li va suvli hududlarda manrov, kassi, mango, palma, rezina va hatto kofe daraxtlari mavjud bo'lgan 130 oroldan iborat maskan. Plyajlardan tashqari, Krabi tabiiy bog‘larga ega va dam olish uchun qulay infrastrukturaga ega. 

Marjon orollar, oq qum, tiniq suv va ajoyib landshaftlar ushbu orolni Krabiga keluvchi sayyohlar orasida ommalashtirgan.

Orolning diqqatga sazovor joylari

1. Txam g‘ori — Krabidan 7 km uzoqlikda joylashgan.
2. Kxao milliy parki — 20 km uzoqlikda joylashgan, qalin va baland daraxtlari, viqorli tog‘lari, issiq buloqlari, yovvoyi hayvon va sharsharalari bilan mashhur. Bu bog‘ni to‘liq aylanib chiqish uchun 3 kun ketadi.
3. Vat Klong Txam muzeyi — toshasridan qolgan asboblar, qadimiy loy buyumlar va 5 000 yillik tarixga ega marjonlar saqlanadi.
4. Namtok sharsharasi — hayvonot bog‘i Kxao-Pra bang Kxham va juda ko‘p plyajlar.

Nima bilan shug‘ullanish mumkin

• Qaynoq buloqlarda cho‘milish. Namtok sharsharasi eng qulay lokatsiya hisoblanadi.
• Kayaking — botqoqli o‘rmon ichra qayiqda suzish va atrofdagi go‘zallikdan bahramand bo‘lishingiz mumkin. Asosiysi ilk marta qayiqda suzayotganlar va professionallar ham bu manzarani bir nafasda, suzib turib his qilishlari mumkin.
• Snorkling va dayving — bu sport turi uchun zarur bo‘lgan “kiyimlarni” ijaraga — kuniga 150 batt (50 ming so‘m) olishingiz mumkin.
•  Velosipedda uchish — qumli sohilda alohida velo yo‘lak bo‘ylab tabiat go‘zalligini his qilishingiz mumkin.
•  Qoyalarga chiqish sporti (skalolazaniye) — 150 ta turli marshrut bilan tanishishingiz mumkin, va albatta tajribasiz sportchilar ham foydalana oladi. Gid va master klaslar tekin o‘tiladi.

Tailand haqida 10 ta qiziqarli fakt

1. Tailand — Osiyodagi eng erkin mamlakat

“Tailand” tay tilida “Pratxet Txay” deya yangraydi, bu esa “ozodlar o‘lkasi” demakdir. Bu yevropaliklar tomonidan hali mustamlakaga aylantirilmagan Janubi-Sharqiy Osiyodagi yagona mamlakatdir.

2. Tailand qiroli — xalq orasida sevimli bo‘lgan monarxlardan biri

Tailandliklar Pxumipon Adulyadetni ko‘p sabablarga ko‘ra yaxshi ko‘radi. U sun’iy bulutlar yaratish uchun patentga ega. U ko‘prik va to‘g‘onlarni ishlab chiqqan, saksofonni mahorat bilan chaladi, mamlakatning milliy madhiyasini yozgan va iste’dodli rassom hamdir.

3. Tailandda hozir 2565-yil

Tailandliklar yil hisobini Budda tug‘ilgan vaqtdan boshlaydi.

4. Vaqt 6 soatli shkalada hisoblanadi

Dunyoning ko‘plab mamlakatlarida vaqtni 12 yoki 24 soatli shkala bilan hisoblashadi, Tailandning katta qismi esa kunni 6 soatlik to‘rtta chorakka bo‘lgan holda yashaydi.

5. Dunyodagi eng uzun nomli shahar Tailandda joylashgan

Tailand poytaxti — Bangkokning to‘liq nomi “Krung Txep Maxanakxon Amon Rattanakosin Maxintarayuttxaya Maxadilok Pxop Nopparat Ratchatxani Burirom Udomratchanivet Maxasatan Amon Piman Avatan Satit Sakkatxattiyya Vitsanukam Prasit” bo‘lib, u “Farishtalar shahri, abadiy yashaydiganlarning buyuk shahri, to‘qqizta qimmatbaho toshning buyuk shahri, Vishvakarman tomonidan Indra amri bilan qurilgan, qiyofasini o‘zgartirgan xudo yashaydigan ibodatxonani eslatuvchi ulkan Qirollik saroyi joylashgan, farovon va baxtli shahar” degan ma’noni anglatadi.

6. Tailandning Ginnes rekordlari

Tailandda Buddaning eng katta oltin haykali, eng yirik timsoh fermasi, eng katta restoran va eng baland mehmonxona joylashgan.

7. Dunyodagi eng mitti sut emizuvchi

Dunyodagi eng kichik sut emizuvchi bo‘lgan cho‘chqaburun ko‘rshapalak ham Tailandda yashaydi, uning og‘irligi tangadan ham yengil.

8. Siam mushuklari — asli Tailanddan

Siam mushuklari vatani Tailanddir, u qadimda Siam deb nomlangan. XIV asr kitoblarida Siam mushuklarining 23 ta turi tilga olingan, hozirda esa 6 xil zot qolgan xolos.

9. Budda monaxlari

Avvallari Tailandda barcha yigitlar, jumladan, qirol ham 20 yoshga to‘lgunicha qisqa muddatga bo‘lsada budda monaxi bo‘lib ko‘rishi kerak edi. Bu odatga bugungi kunda ham ko‘pchilik rioya qiladi.

10. Bosh — tananing eng muhim qismi

Shu tufayli, mamlakatda birov, hatto, chaqaloqning ham boshiga qo‘l tekkizish mumkin emas.

Muxlisa Yusupova