Хоразмда ўз онасини дўппослаб ўлдирган йигитга ҳукм ўқилди

Хоразм вилояти Тупроққалъа туманида ўз онасини дўппослаб ўлдирган ўғилга суд ҳукми ўқилди. Бу ҳақда вилоят ИИБ ахборот хизмати хабар берди. 

Унга кўра, мазкур туманда яшайдиган йигит ичкилик оқибатида уйига келиб онаси билан жанжаллашган. Жанжал вақтида онасининг турли гапларидан ғазабланган йигит уни дўппослай бошлаган. Аёл қочишга уринган вақтида ўғли яна уни судраган ва уришда давом этган. 

Шундан сўнг ўғил хонасига кириб кетган. Аёл ҳам ярадор ҳолида хонасига кириб, ҳушини йўқотган. Тонг вақтида ўғил онасининг олдига кирганида онаси қимирламай ётганини кўрган, лекин яна ётоғига кириб ухлашда давом этган. Аёлнинг уйига келган укаси унинг ўлиб ётганига гувоҳ бўлган. Тез ёрдам ходимлари етиб келгач, аёлнинг 3-4 соат аввал жони узилгани маълум бўлган. 

Жиноят ишлари бўйича Боғот туман суди унинг мастлик ҳолатида одам ўлдириш билан боғлиқ жиноятни содир қилганини оғирлаштирувчи ҳолат деб баҳолаб, унинг айбига тўлиқ иқрорлигини, муқаддам судланмаганини, жабрланувчининг қонуний вакили томонидан даъво йўқлигини ва ишдаги бошқа ҳолатларни эътиборга олиб, уни 8 йил муддатга озодликдан маҳрум қилди.