Toshkent shahrida o‘z onasini o‘ldirib, yerto‘laga ko‘mib qo‘ygan yigit 10 yilga qamaldi. Bu haqda poytaxt sudi matbuot kotibi “Daryo”ga xabar berdi.
Xabarga ko‘ra, holat tungi vaqtda, 02:00 lar atrofida sodir bo‘lgan. Sudda ko‘rsatma bergan o‘g‘il voqea sodir bo‘lgan kuni dastlab onasi uni o‘ldirishga uringanini, bir necha bor uni to‘xtatganini aytgan. U o‘zini himoya qilish maqsadida onasining qo‘lidagi pichoqni uning bo‘yniga tiqib olgan. Shundan so‘ng ayol yiqilgan. Yigit jinoyatini yashirish maqsadida murdani yerto‘lada avvaldan tayyorlab qo‘yilgan chuqurga ko‘mgan.
“O‘sha tunda onam uxlashimni, ertasi kuni ertalabdan bozorga tushishimizni aytdi. Yarim tunda uyg‘onib ketdim, soat 02:00 edi. Onam menga idishda suv olib keldi va ichib ol, dedi. Kosadagi suvni ichib, uxlab qoldim. 20 daqiqa o‘tgach, yana uyg‘ondim. O‘sha vaqt onam meni urayotganini angladim. Bu holat uyning mehmonxonasida sodir bo‘ldi. Onam balkondan temirdan yasalgan idishni olib kelib, tizza va oyoqlarimga urdi va oshxona pichog‘ini ko‘tarib keldi, menga tiqmoqchi bo‘ldi. Pichoq ushlagan qo‘lidan ushlab, oshxonaga qamab qo‘ydim. U yerdan chiqib, pichoq bilan tashlanmoqchi bo‘ldi. O‘sha vaqt qo‘lidan ushlab oldim va onamni o‘ldirish maqsadida pichoqni uning bo‘yin qismiga tiqdim. Shu payt onam yiqilib, peshonasi bilan devorga urildi. Yerga yiqildi, boshi pastga qaragan holda yotardi. Uning boshini orqa qismidan ushlab turdim, bo‘yin qismidan qon keta boshladi. Onam qo‘limdan chiqmoqchi bo‘ldi, men esa boshini yerga qaratib bir necha marta urdim va joni uzilganini sezdim.
Bu voqea oshxonada sodir bo‘ldi. Jasadni uydan yo‘qotish maqsadida ko‘tarishga harakat qildim. Vazni og‘irligi sababli ko‘tarishga qiynaldim. Ko‘tarishga qulay bo‘lishi uchun qo‘l-oyoqlarini yerto‘ladan olib chiqqan eski latta bo‘lagi bilan bog‘ladim va sudrashga qaror qildim. Uydan tashqariga chiqib, yon atrofni ko‘zdan kechirdim. Hech kim yo‘qligiga amin bo‘lgach, yerto‘laga murdani ko‘mish maqsadida chuqur qazib tayyorladim. Qo‘llaridan tortib, podyezdga olib chiqdim, murdani bir amallab yerto‘laga sudrab olib tushdim. Tayyorlab qo‘yilgan yerto‘la ichidagi chuqurga ko‘mib tashladim. Hech kim bilmasligi uchun ustini yopib qo‘ydim.
Oshxonadagi qon izlarini yo‘qotish maqsadida ko‘rpacha, palos, xontaxta va stuldagi qon dog‘larini nam latta bilan tozaladim. Latta va ustimdagi kiyimlarni yechib, ularni yuvdim. Qon dog‘lari bo‘lgan paketlarni ham musor idishga tashlab yubordim. Oradan 2-3 kun vaqt o‘tgandan so‘ng Ichki ishlar organi xodimlariga borib, “onam yo‘qolib qoldi”, dedim, ammo o‘ldirganimni gapirmadim. Ular tomonidan yashash xonadonimning yerto‘lasi ko‘zdan kechirilganda, onamning jasadi qotillik alomatlari bilan topildi va aybimni tan oldim”, — deydi qilmishidan pushaymonligini bayon qilgan sudlanuvchi.
Sud-tibbiyot ekspertizasining xulosasiga ko‘ra, ayolning o‘limi bosh miya yopiq jarohati fonida, bo‘yin qon tomirlari va yumshoq to‘qimalarining shikastlanishiga olib kelgan va bo‘yin orqa yuzasi o‘ng tomonlama kesilgan yarasi oqibatida kelib chiqqan tashqi qon yo‘qotishdan yuz bergani aniqlangan.
Sudlanuvchi Jinoyat kodeksining 97-moddasi (qasddan odam o‘ldirish) 1-qismi bilan aybdor deb topildi va 10 yil muddatga ozodlikdan mahrum qilindi.
Izoh (0)