Xorazmdagi ixtisoslashtirilgan maktab o‘tkazgan 94 mln so‘mlik tender bekor qilindi
Xorazm viloyati Qo‘shko‘pir tuman davlat ixtisoslashtirilgan maktabi 94 mln so‘mlik tenderni nohalol o‘tkazgani haqida xabar berilgandi. Korrupsiyaga qarshi kurashish agentligi holatga munosabat bildirdi.
Qayd etilgan holatlar agentlik mutaxassislari tomonidan o‘rganilgan. Aniqlanishicha, Prezident taʼlim muassasalari agentligi tizimidagi Qo‘shko‘pir tuman ixtisoslashtirilgan maktabi buyurtmachiligida maʼnaviyat targ‘ibot stendlari sotib olish va o‘rnatish yuzasidan 94,8 million so‘mlik tanlash o‘tkazilishi haqida eʼlon joylashtirilgan. Muassasa xarid komissiyasining 19-may kunidagi g‘olibni aniqlash bayonnomasi bilan “R.I” MChJ tanlash g‘olibi, “M.Y.F” MChJ esa zaxiradagi g‘olib deb topilgan.
“O‘rganish davomida tanlashda g‘oliblikni qo‘lga kiritgan hamda zaxiradagi g‘olib deb topilgan jamiyatlarning taʼsischi va rahbarlari o‘zaro affillangan shaxslar bo'lsa-da, ular xarid komissiyasi tomonidan xarid qilish jarayonidan chetlatilmagani va natijada “Davlat xaridlari to‘g‘risida”gi qonunning 42-moddasi talablari qo‘pol ravishda buzilgani aniqlandi”, — deyiladi xabarda.
Yozilishicha, shu va boshqa qonun buzilishi holatlari yuzasidan 22-may kuni xarid komissiyasi bayonnomasini bekor qilish yuzasidan taqdimnoma kiritilgan.
Bundan tashqari, qonun buzilishi holatlariga huquqiy baho berish uchun to‘plangan hujjatlar Davlat moliyaviy nazorat inspeksiyasiga yuborilgan.
