Shavkat Mirziyoyev taklifiga binoan 23-may kuni O‘zbekistonga kelgan Singapur prezidenti Halima Yaqub tashrif dasturiga ko‘ra 25-may kuni Samarqandda bo‘ldi. “Afrosiyob” poyezdida Samarqand shahriga kelgan oliy martabali mehmonni viloyat hokimi Erkinjon Turdimov kutib oldi.
Tashrif dastlab Imom Buxoriy majmuasini ziyorat qilish bilan boshlandi. O‘zAning ma’lum qilishicha, O‘zbekiston prezidenti maslahatchisi Muzaffar Komilov Singapur prezidentiga Shavkat Mirziyoyev tashabbusi bilan yangidan bunyod etilayotgan mazkur majmuadagi qurilish-bunyodkorlik ishlari, obyektning avvalgi holati haqida ma’lumot berdi.
Ziyoratchilar uchun majmua va uning atrofida yaratilayotgan imkoniyat va qulayliklar ziyorat turizmini rivojlantirishga xizmat qilishi qayd etildi.
Shundan so‘ng Halima Yaqub Imom Buxoriy xalqaro ilmiy-tadqiqot markazi va bu yerdagi muzey faoliyati bilan tanishdi. Shavkat Mirziyoyev tashabbusi bilan tashkil etilgan xalqaro markazda buyuk allomalar, muhaddislar merosi tadqiq etilayotgani, qisqa vaqt ichida o‘nlab tarixiy kitoblar nashr etilgani haqida ma’lumot berildi.
Muzeydagi tarixiy ashyolar, turli davrlarga oid Qur’on va boshqa muqaddas kitoblar nusxalari, buyuk muhaddisning hayoti xronologik tartibda ishlangan suratlar mehmonlarda katta qiziqish uyg‘otdi.
Singapur prezidenti Hadis maktabida ham bo‘ldi va bu yerda faoliyat ko‘rsatayotgan o‘qituvchilar hamda tinglovchilar bilan suhbatlashdi. Maktabda hadis ilmini o‘rganayotgan yoshlar uchun yaratilgan shart-sharoit va imkoniyatlarga yuqori baho berildi.
Hadis maktabidan so‘ng Singapur prezidenti Amir Temur maqbarasini ziyorat qildi. Oliy martabali mehmonga Amir Temur hayoti va davlatchilik tarixi, bunyodkorlik ishlari haqida ma’lumot berildi.
Ziyoratdan keyin Singapur prezidenti Registon maydonini tomosha qildi. Unga mazkur obidaning yaratilish tarixi va uni asrab-avaylash borasida tomonidan ko‘rilayotgan chora-tadbirlar haqida ma’lumot berildi.
“Avvalo taklif uchun prezident Shavkat Mirziyoyevga minnatdorlik bildiraman. Bu tashriflar ikki tomonlama munosabatlarda yangi davrni boshlashi, shubhasiz. Samarqandga safarimiz ham taassurotlarga boy bo‘lmoqda. Ayniqsa, Islom olamining qutlug‘ maskanlaridan biri bo‘lgan Imom Buxoriy majmuasi ziyoratidan juda xursand bo‘ldik. Bu ulug‘ muhaddisning ilmiy merosi butun musulmon dunyosining boyligi, — degan shu yerda OAV xodimlariga intervyu bergan Halima Yaqub.
Singapur prezidenti Siyob dehqon bozorini ham borib ko‘rdi. O‘zbekistonda yetishtirilgan mahsulotlar va milliy hunarmandlik buyumlari xarid qildi.
Shu bilan Singapur prezidentining Samarqandga safari yakunlanib, Toshkentga qaytib ketdi.
Izoh (0)