O‘zbekiston axborot-kutubxona sohasida 45 nafar xodim “Axborot va kutubxona a’lochisi” ko‘krak nishoni bilan taqdirlandi

Buxoro shahridagi Yoshlar ijod markazida “Central Asia – 2023: Fan, ta’lim, madaniyat va biznesda Internet va axborot-kutubxona resurslari” XVI xalqaro konferensiyasining ochilish marosimi bo‘lib o‘tdi. Konferensiyada Qirg‘iziston, Qozog‘iston, Ozarbayjon, Armaniston, Turkiya, Belarus, AQSH, Rossiya, Tojikiston davlatlaridan 60 dan ziyod hamda mamlakatdan 400 ga yaqin arxiviarus, axborot-kutubxona rahbarlari va xodimlari, shuningdek, boshqa mutasaddi soha vakillari ishtirok etdi.

Bundan tashqari, Niderlandiya va Litva davlatlaridan ham onlayn tarzda ishtirokchilar qatnashdi. Xalqaro konferensiyani axborot va ommaviy kommunikatsiyalar agentligi direktori A.Xodjayev ochib berdi hamda barcha qatnashchilarni bayramda ishtiroki bilan qutladi. 

“Bilim, ta’lim, mutolaa va kitoblar orqali intellektual kapitalni shakllantirmasdan davlat taraqqiyotiga erishib bo‘lmaydi. Bugun axborot-kommunikasiya texnologiyalarining jadal o‘sishiga qaramay, aynan kitob va mutolaa jamiyatning ijtimoiy-iqtisodiy hamda madaniy rivojlanishining bosh mezoni hisoblanadi. Global axborot jamiyati va tezkor ijtimoiy o‘zgarishlar davrida kitobxonlik doimgidanda muhimroqdir”, — dedi agentlik direktori nutqi davomida.

XVI Xalqaro konferensiyaning ochilish marosimida, shuningdek, Buxoro viloyat hokimi Botir Zaripov ham so‘zga chiqib, Buxoro shahrida ushbu xalqaro konferensiyaning o‘tkazilayotganidan mamnunligini ta’kidladi va 3 kun davomida ishtirokchilarning samarali muloqotlari yo‘lga qo‘yilish uchun Buxoro hokimligi ko‘maklashishga tayyorligini bildirdi.

Shu bilan bir qatorda, tadbirda Rossiya davlat kutubxonasi bosh direktori, Kutubxonalar assosiatsiyasi va muassasalari xalqaro federatsiyasi prezidenti, Ozarbayjon, Tojikiston davlatlari milliy kutubxonasi direktorlari, Kutubxonalar uchun elektron axborot xalqaro konsorsiumi direktori va qator mutasaddilar ham so‘zga chiqdi.

Ochilish marosimida O‘zbekiston axborot-kutubxona sohasida uzoq yillar davomida samarali faoliyat yuritgan, yosh salohiyatli kadrlar tayyorlashda munosib hissa qo‘shgan hamda milliy-madaniy merosni avaylab-asrashdagi yuqori xizmatlari uchun 45 nafar fidoyi xodim “Axborot va kutubxona a’lochisi” ko‘krak nishoni bilan taqdirlandi.

Kunning ikkinchi yarmida xorijiy soha mutaxassislari axborot-kutubxona rivojidagi tajribalari haqida taqdimotlar qildi.