Qozog‘istonning yangi siyosiy va ma’muriy xaritasini tuzish uchun hukumat 56 million tenge (qariyb 125 ming dollar) sarfladi. Bu haqda respublika Raqamli rivojlanish, innovatsiyalar va aerokosmik sanoat vazirligi vakillari brifingda ma’lum qildi, deb xabar bermoqda Informburo.
Rasmiylarning ta’kidlashicha, ushbu summa oltita viloyatning geografik xaritalarini, viloyat markazlarining reja-sxemalarini va mamlakatning umumiy siyosiy xaritasini yangilashga sarflangan.
Vazirlik boshlig‘i o‘rinbosari Aset Turisovning so‘zlariga ko‘ra, 2022-yilda uchta yangi viloyat tashkil etilgandan so‘ng vazirlik oldida Qozog‘istonning siyosiy xaritasi va oltita hududning tematik xaritalarini yangilash vazifasi qo‘yilgandi, bular: yangi tashkil etilgan Abay, Yettisuv va Ulitov viloyatlari, shuningdek, chegaralari o‘zgargan Olmaota, Sharqiy Qozog‘iston va Qarag‘anda viloyatlari.
“Ko‘p ishlarni amalga oshirgan hamkasblarimiz yakunda Qozog‘istonning 1:1 500 000 masshtabdagi siyosiy va ma’muriy xaritasini tuzdi. Qarag‘anda, Olmaota viloyatlari va Sharqiy Qozog‘iston viloyatlari xaritalari yangilandi, 1:1 000 000 masshtabda Abay, Yettisuv va Ulitov viloyatlari xaritalari yaratildi. Shuningdek, Qarag‘anda, Semey va Ust-Kamenogorsk kabi shaharlarning 1:25 000 masshtabdagi reja-sxemalari hamda Jezkazg‘on, Konayev va Taldiqo‘rg‘on shaharlarining 1:10 000 mashshtabdagi reja sxemalari yangilandi va yaratildi”, — dedi Turisov.
Qozog‘iston Geodeziya va kartografiya qo‘mitasi raisi o‘rinbosari Asimov yangi xaritani tuzishdagi asosiy qiyinchilikni muddatlarning tig‘izligi bilan izohladi.
“Oson ishning o‘zi yo‘q, albatta, qiyinchiliklar bo‘ladi. Bizda muddatlar qat’iy belgilangandi, ammo shunga qaramay, mutaxassislarimiz, muassasa qo‘shidagi korxona mutaxassislari yordamida xaritalar o‘z vaqtida to‘ldirilib, mijozga taqdim etildi”, — deya ta’kidladi amaldor.
Turisov, o‘z navbatida, xaritani tuzish jarayonida qo‘mita xodimlari deyarli butun mamlakat bo‘ylab safar qilib, barcha arxiv ma’lumotlarini to‘plashganini ta’kidladi.
“Bu oddiy xaritalar emas. Ularning aniqligi juda muhim, chunki u yerda ko‘llar, tog‘lar, o‘rmonlar mavjud, shuning uchun ularni geografik jihatdan ko‘rsatish kerak, shunda chegara hududlari ular qayerda tugaganini tushunadi. Bizda butun bir qo‘mita bor, quyi tashkilotlar bor, ular kartografiyaning katta fondi hisoblanadi. Yaqinda ko‘plab normalarni tartibga soluvchi qonun qabul qildik, bu esa soha rivojlanishiga turtki bo‘ldi”, — deya xulosa qildi Turisov.
Izoh (0)