Qozog‘iston prezidenti Qosim-Jo‘mart To‘qayev 17-may kuni 70 yoshni qarshilaydi. Siyosatchining matbuot kotibi Ruslan Jeldibay prezident tug‘ilgan kunini qanday o‘tkazishi haqida ma’lumot berdi.
Jeldibayning ta’kidlashicha, prezident matbuot xizmatiga uning yaqinlashib kelayotgan yubileyi haqida savollar kelib tushmoqda.
“Tug‘ilgan kun munosabati bilan hech qanday tadbir rejalashtirilmagan. Bu prezidentning prinsipial pozitsiyasi. Davlat rahbari 17-mayni odatdagidek o‘tkazadi”, — dedi u.
Shu kuni Qosim-Jo‘mart To‘qayevning Xitoyga davlat tashrifi boshlanadi. Qozog‘istonda ham, Xitoyga tashrif doirasida ham tug‘ilgan kun tadbirlari o‘tkazilmaydi.
Qayd etish joizki, o‘tgan yillar davomida ham Qosim-Jo‘mart To‘qayev tug‘ilgan kunini nishonlamagan. Uning sobiq matbuot kotibi Berik Uali avvalroq tushuntirganidek, prezident bu kunni nishonlashni yoqtirmaydi, chunki uning oilasida bolalarning ham, ota-onalarning ham tug‘ilgan kunini nishonlash odat tusiga kirmagan.
Eslatib o‘tamiz, Qosim-Jo‘mart To‘qayev 1953-yilda Olmaota shahrida taniqli yozuvchi Kemel To‘qayev va o‘qituvchi Turar Shabarbayeva oilasida tug‘ilgan. 1970-yilda 25-sonli o‘rta maktabni tugatgach, To‘qayev Moskva davlat xalqaro aloqalar institutiga o‘qishga kirdi. 1992-yilda Rossiya Tashqi ishlar vazirligi Diplomatik akademiyasini tamomladi.
Qosim-Jo‘mart To‘qayev mehnat faoliyatini 1975-yilda SSSR Tashqi ishlar vazirligida navbatchi referent sifatida boshlagan. Turli yillarda SSSR Tashqi ishlar vazirligi kotibi, vazir o‘rinbosari, keyinroq Qozog‘iston tashqi ishlar vaziri, bosh vazir o‘rinbosari, bosh vazir, senat raisi lavozimlarida ishlagan.
2011—2013-yillarda BMT bosh kotibi o‘rinbosari, BMTning Jenevadagi bo‘limi bosh direktori, Qurolsizlanish bo‘yicha konferensiyada BMT Bosh kotibining shaxsiy vakili bo‘lgan. 2019-yilning mart oyidan Qozog‘iston respublikasi prezidenti lavozimida ishlab kelmoqda.
Izoh (0)