Qozog‘iston energetika vaziri Almasadam Satkaliyev Rossiya gazining O‘zbekistonga ehtimoliy tranziti haqida ma’lumot berdi. Bu haqda Tengrinews xabar berdi.
Hukumat yig‘ilishi chog‘ida jurnalistlar Satkaliyevdan Qozog‘iston, O‘zbekiston va Rossiya o‘rtasida gaz ittifoqi tuzish bo‘yicha muzokaralar olib borilyaptimi, degan savolni berdi.
“Hozirgi vaqtda Rossiya gazini O‘zbekistonga tranzit qilish imkoniyatlari muhokama qilinmoqda, muzokaralar ancha konstruktiv ruhda olib borilmoqda”, — deya vazir jurnalistlarga javob berdi.
Bundan tashqari, Qozog‘iston orqali Rossiyadan Xitoyga gaz quvurini qurish ehtimoli bo‘yicha ham muzokaralar olib borilmoqda.
“Rossiyadan Qozog‘istonning shimoliy hududlari orqali Xitoyga gaz quvurini qurish masalasi muhokama qilinmoqda. Marshrut oldindan belgilab qo‘yilgan, ushbu gaz quvurini qurish shartlari muhokama qilinmoqda”, — dedi u.
“Uch tomonlama gaz ittifoqi”
Rossiya prezidenti Vladimir Putin va Qozog‘iston prezidenti Qosim-Jo‘mart To‘qayev noyabr oxirida Kremlda bo‘lib o‘tgan uchrashuvda Rossiya gazini Qozog‘iston va O‘zbekiston hududi orqali tashish bo‘yicha harakatlarni muvofiqlashtirish uchun O‘zbekiston ishtirokida “uch tomonlama gaz ittifoqi”ni yaratish masalasini muhokama qilgandi.
“‘Uch tomonlama ittifoq’ g‘oyasi birinchi bosqichda, ehtimol, ma’lum bir yuridik shaxs bilan muvofiqlashtirish mexanizmini yaratish imkoniyatini nazarda tutadi, ammo bunday masalalar hali ham muhokama qilinishi kerak”, — deb tushuntirgan Peskov.
“Rossiya, Qozog‘iston va O‘zbekiston gaz sohasida, jumladan, gaz yetkazib berish va uni qayta ishlash sohasida hamkorlik qilish uchun katta salohiyatga ega”, — degan Rossiya Bosh vaziri o‘rinbosari Aleksandr Novak.
18-yanvar kuni esa “Gazprom” Qozog‘iston bilan 24-yanvar kuni O‘zbekiston bilan gaz sohasida hamkorlik bo‘yicha yo‘l xaritasi imzolagan.
O‘z navbatida, O‘zbekiston energetika vaziri Jo‘rabek Mirzamahmudov dekabr oyida O‘zbekiston qo‘shni davlatlardan gaz va elektr energiyasini qandaydir alyans yoki ittifoq orqali emas, balki tijorat shartnomalari asosida import qilish niyatida ekanini aytgandi.
Izoh (0)