Қозоғистоннинг янги сиёсий ва маъмурий харитасини тузиш учун ҳукумат 56 миллион тенге (қарийб 125 минг доллар) сарфлади. Бу ҳақда республика Рақамли ривожланиш, инновациялар ва аэрокосмик саноат вазирлиги вакиллари брифингда маълум қилди, деб хабар бермоқда Informburo.
Расмийларнинг таъкидлашича, ушбу сумма олтита вилоятнинг географик хариталарини, вилоят марказларининг режа-схемаларини ва мамлакатнинг умумий сиёсий харитасини янгилашга сарфланган.
Вазирлик бошлиғи ўринбосари Асет Турисовнинг сўзларига кўра, 2022 йилда учта янги вилоят ташкил этилгандан сўнг вазирлик олдида Қозоғистоннинг сиёсий харитаси ва олтита ҳудуднинг тематик хариталарини янгилаш вазифаси қўйилганди, булар: янги ташкил этилган Абай, Еттисув ва Улитов вилоятлари, шунингдек, чегаралари ўзгарган Олмаота, Шарқий Қозоғистон ва Қарағанда вилоятлари.
“Кўп ишларни амалга оширган ҳамкасбларимиз якунда Қозоғистоннинг 1:1 500 000 масштабдаги сиёсий ва маъмурий харитасини тузди. Қарағанда, Олмаота вилоятлари ва Шарқий Қозоғистон вилоятлари хариталари янгиланди, 1:1 000 000 масштабда Абай, Еттисув ва Улитов вилоятлари хариталари яратилди. Шунингдек, Қарағанда, Семей ва Уст-Каменогорск каби шаҳарларнинг 1:25 000 масштабдаги режа-схемалари ҳамда Жезказғон, Konaев ва Талдиқўрғон шаҳарларининг 1:10 000 машштабдаги режа схемалари янгиланди ва яратилди”, — деди Турисов.
Қозоғистон Геодезия ва картография қўмитаси раиси ўринбосари Асимов янги харитани тузишдаги асосий қийинчиликни муддатларнинг тиғизлиги билан изоҳлади.
“Осон ишнинг ўзи йўқ, албатта, қийинчиликлар бўлади. Бизда муддатлар қатъий белгиланганди, аммо шунга қарамай, мутахассисларимиз, муассаса қўшидаги корхона мутахассислари ёрдамида хариталар ўз вақтида тўлдирилиб, мижозга тақдим этилди”, — дея таъкидлади амалдор.
Турисов, ўз навбатида, харитани тузиш жараёнида қўмита ходимлари деярли бутун мамлакат бўйлаб сафар қилиб, барча архив маълумотларини тўплашганини таъкидлади.
“Бу оддий хариталар эмас. Уларнинг аниқлиги жуда муҳим, чунки у ерда кўллар, тоғлар, ўрмонлар мавжуд, шунинг учун уларни географик жиҳатдан кўрсатиш керак, шунда чегара ҳудудлари улар қаерда тугаганини тушунади. Бизда бутун бир қўмита бор, қуйи ташкилотлар бор, улар картографиянинг катта фонди ҳисобланади. Яқинда кўплаб нормаларни тартибга солувчи қонун қабул қилдик, бу эса соҳа ривожланишига туртки бўлди”, — дея хулоса қилди Турисов.
Изоҳ (0)