AQSH rasmiylari bo‘lingan Koreya bilan bog‘liq vaziyat misolida Rossiya-Ukraina urushi o‘nlab yillar davomida muzlatilgan mojaroga aylanishi ehtimolini ko‘rib chiqmoqda. Bu haqda Vashingtondagi manbalarga tayanib, Politico nashri xabar berdi.
AQSH prezidenti Jo Bayden maʼmuriyatida uzoq muddatli muzlatish variantlari orasida Ukraina va Rossiya kesib o‘tmaslikka rozi bo‘ladigan potensial chegaralarni qayerda o‘rnatish muhokama qilinmoqda. Lekin ular rasmiy chegaralar bo‘lishi shart emas. Dastlabki muhokamalar AQSHning turli departamentlarida va Oq uyda bo‘lib o‘tmoqda.
Kiyev ham, Moskva ham mag‘lubiyatni tan olmoqchi emasligini hisobga olsak, bu ssenariy uzoq muddatda eng real bo‘lishi mumkin. Bundan tashqari, AQSH maʼmuriyati Ukrainaning bo‘lajak qarshi hujumi Rossiyaga xavfli zarba bermasligi haqida aytayotgani sababli, bu tobora kuchayib bormoqda.
Qayd etilishicha, muzlatilgan konflikt AQSH va Ukrainaning boshqa hamkor davlatlari uchun siyosiy jihatdan maqbul uzoq muddatli natija bo‘lishi mumkin, chunki bu Kiyevni qo‘llab-quvvatlash xarajatlarini kamaytiradi. Buning evaziga Ukrainaga AQSH va NATO bilan uzoq muddatli xavfsizlik aloqalari taklif qilinishi mumkin.
Nashr suhbatdoshlaridan biri bir vaqtning o‘zida vaziyat rivojlanishining bir nechta ssenariylarini rejalashtirish Vashingtonga xos ekanini taʼkidlaydi.
“Baʼzi amerikalik rasmiylar va tahlilchilarning aytishicha, qo‘pol modellardan biri Koreya urushi bo‘lishi mumkin. Ushbu mojarodagi faol jangovar harakatlar 1953-yilda sulh bilan yakunlangan, biroq 70 yil o‘tsa ham urush rasman tugagani eʼlon qilinmagan”, — deyiladi xabarda.
Izoh (0)