2017-yilda Nyu-Yorkda terakt sodir etgan o‘zbekistonlik Sayfullo Soipov Amerika sudi tomonidan ketma-ket sakkiz karra va bir vaqtning o‘zida ikki karra umrbod, qo‘shimcha yana 260 yillik qamoq jazosiga hukm qilindi. AQSH Adliya vazirligi xabariga ko‘ra, hukm 17-may kuni chiqarilgan.
Qarorni sharhlar ekan, AQSH bosh prokurori Merrik B. Garland shunday dedi:
“Hukm Sayfullo Soipov ISHIDning puxta rejalashtirilgan teraktida sakkiz nafar begunoh odamni shafqatsizlarcha o‘ldirgani uchun uning butun umrini federal qamoqxonada o‘tkazishini anglatadi”.
O‘z navbatida, AQSHning Nyu-York janubiy okrugi prokurori Damian Uilyams “sakkiz karra umrbod qamoq jazosi Soipov teraktda sakkiz kishining hayotiga zomin bo‘lgani uchun, 260 yil qamoq jazosi esa 18 kishi, jumladan to‘rt bolaning hayotiga qasd qilishga uringani uchun maksimal jazo” ekanligini tushuntirdi.
2023-yil yanvarida hakamlar hay’ati O‘zbekiston fuqarosi Sayfullo Soipovni 2017-yilda Nyu-Yorkda terakt sodir etish va sakkiz kishini o‘ldirishda aybdor deb topgandi.
Mart oyida Soipov ustidan hukm chiqarish jarayonida ishtirok etgan hakamlar hay’ati qatl hukmi uchun zarur bo‘lgan yakdil qarorga kela olmadi.
Soipov va uning jinoyati haqida
Sayfulla Soipov 1988-yil 8-fevralda Toshkent shahrida tug‘ilgan. 2005-yilda kasb-hunar kollejini tamomlagan, 2005−2009-yillarda Toshkent moliya institutida ta’lim olgan. OTMni tamomlaganidan so‘ng poytaxtdagi “Sayohat” mehmonxonasida hisobchi bo‘lib ishlagan.
U Qo‘shma Shtatlarga 2010-yilda grin-karta orqali borgan. 2017-yil 31-oktabrida u kichik yuk mashinasini ijaraga oladi va velosipedlar harakatlanadigan yo‘lakka bostirib kiradi. Uning qurboniga aylangan sakkiz kishi orasida Argentinadan kelgan besh kishi va bir nafar Belgiya fuqarosi bo‘lgan, yana 12 kishi tan jarohati olgan. Soipovni uning qorniga o‘q uzgan politsiyachi to‘xtatadi.
Soipov ISHID nomidan harakatlanganini tan olgan va o‘zini ushbu guruh “askari” deb atagan. (U AQSHga ketguniga qadar jinoiy javobgarlikka tortilmagan va huquqni muhofaza qilish organlari e’tiboriga tushmagan).
Sayfullo Soipov umrining qolgan qismini Kolorado shtatidagi maksimal darajada qat’iy rejimdagi ADX Florence federal qamoqxonasida o‘tkazadi. 2013-yil aprelida Boston marafonida portlashlar uyushtirishda ayblanib, o‘limga hukm qilingan Johar Sarnayev ham shu qamoqxonada saqlanmoqda.
Izoh (0)