Nyu-York binolar og‘irligidan cho‘kmoqda — geologlar

Geologlar osmono‘par binolarning og‘irligi sababli Nyu-York cho‘kayotganini maʼlum qildi. Bu haqda New York Post xabar berdi.

Maʼlum qilinishicha, shahar yiliga 1-2 millimetr tezlikda suvga cho‘kmoqda, baʼzi hududlarda esa bu ko‘rsatkich tezroq. AQSH Geologiya xizmatining yetakchi tadqiqotchisi va geologi Tom Parsonsning fikricha, ayrimlar uchun bu ahamiyatsiz bo‘lsa-da, asta-sekin cho‘kish Nyu-Yorkni tabiiy ofatlarga juda zaif qiladi. Quyi Manxetten, ayniqsa, Bruklin va Kvins ko‘proq xavf ostida.

“Nyu-York suv toshqini xavfi bilan bog‘liq jiddiy muammolarga duch kelmoqda; dengiz sathining ko‘tarilish xavfi Shimoliy Amerikaning Atlantika sohillari bo‘ylab o‘rtacha global ko‘rsatkichdan 3-4 baravar yuqori. Nyu-Yorkdagi 8,4 million aholi turli darajadagi toshqin xavfi ostida”, — deydi Tom Parsons.

O‘n yildan ko‘proq vaqt oldin boshlangan mazkur og‘ir oqibatlarni shahar allaqachon ko‘rgan. Geologning so‘zlariga ko‘ra, yaqinda sodir bo‘lgan ikki dovul Nyu-Yorkda qurbonlar va katta vayronagarchiliklarga sabab bo‘lgan.

“2012-yilda ʼSendiʼ to‘foni dengiz suvini shaharga olib kirdi, 2021-yilda ‘Ida’ dovuli oqibatida kuchli yog‘ingarchilik shahar chegaralaridagi drenaj tizimlarini to‘sib qo‘ydi”, — deydi geolog.

Tom Parsons shahardagi ko‘plab binolarning strukturaviy yaxlitligi kelajakda xavf ostida bo‘lishi mumkinligidan qo‘rqadi.

“Tektonik va antropogen cho‘kish, dengiz sathining ko‘tarilishi va bo‘ron intensivligining ortishi muammoning qirg‘oq va daryo bo‘yidagi hududlarda tezlashayotganini anglatadi. Sho‘r suvning bino poydevoriga qayta-qayta taʼsir qilishi mustahkamlovchi po‘latni korroziyaga olib keladi va betonni kimyoviy jihatdan zaiflashtiradi, bu esa strukturaning zaiflashishiga sabab bo‘ladi”, — deydi mutaxassis.