AQSH rasmiylari Yevropada ukrainalik uchuvchilarni Amerikaning Lockheed Martin harbiy-sanoat korporatsiyasi tomonidan ishlab chiqarilgan F-16 qiruvchi samolyotlari bilan o‘qitishga ruxsat bermayapti. Bu haqda The New York Times nashriga anonimlik sharti bilan Ukrainaning yuqori martabali mulozimlaridan biri ma’lum qildi.
16-may kuni Buyuk Britaniya va Niderlandiya hukumat rahbarlari Kiyev harbiy yordam sifatida so‘ragan zamonaviy qiruvchi samolyotlarni xarid qilish bo‘yicha xalqaro koalitsiya tuzilganini e’lon qildi. F-16 samolyotlarini yetkazib berish faqat AQSH ruxsati bilan amalga oshirilishi mumkin. Bu holat mashg‘ulotlarga ham taalluqli: Yevropadagi hamkorlar ukrainalik uchuvchilarni faqat texnik til bilan tanishtirishlari va taktika darslarini o‘tkazishlari mumkin, samolyotlarda sinov parvozlarini o‘tkazish uchun ularga ruxsat berilmagan.
Jo Bayden maʼmuriyati rasmiysining NYT’ga aytishicha, Vashington hali ham Kiyevga o‘z qiruvchilarini jo‘natish niyatida emas, chunki bu juda qimmat va vaqt talab etadi. Qo‘shma Shtatlar asosiy e’tiborni boshqa qurol-yarog‘larni yetkazib berishga qaratmoqchi, biroq amaldor oxir-oqibat Yevropadagi ittifoqchilarga F-16 samolyotlarini Ukrainaga reeksport qilish uchun litsenziya berilishini istisno etmayapti.
Niderlandiya, Daniya va Belgiya Kiyev bilan o‘z qiruvchilarini baham ko‘rish istagini allaqachon bildirgan. Mutaxassislarning fikricha, bu davlatlar kamida 125 ta tayyor F-16 samolyotlarini yetkazib bera oladi. Norvegiya ham o‘zining foydalanishdan chiqarilgan Amerika qiruvchilarini topshirishga tayyor.
Ukraina hukumati Rossiya bilan havoda to‘qnashish uchun 180 ga yaqin zamonaviy qiruvchi kerakligini ta’kidlagan, ammo hozirda Kiyev 24—36 ta samolyot so‘ramoqda.
Izoh (0)