АҚШ расмийлари бўлинган Корея билан боғлиқ вазият мисолида Россия-Украина уруши ўнлаб йиллар давомида музлатилган можарога айланиши эҳтимолини кўриб чиқмоқда. Бу ҳақда Вашингтондаги манбаларга таяниб, Politico нашри хабар берди.
АҚШ президенти Жо Байден маъмуриятида узоқ муддатли музлатиш вариантлари орасида Украина ва Россия кесиб ўтмасликка рози бўладиган потенсиал чегараларни қаерда ўрнатиш муҳокама қилинмоқда. Лекин улар расмий чегаралар бўлиши шарт эмас. Дастлабки муҳокамалар АҚШнинг турли департаментларида ва Оқ уйда бўлиб ўтмоқда.
Киев ҳам, Москва ҳам мағлубиятни тан олмоқчи эмаслигини ҳисобга олсак, бу сценарий узоқ муддатда энг реал бўлиши мумкин. Бундан ташқари, АҚШ маъмурияти Украинанинг бўлажак қарши ҳужуми Россияга хавфли зарба бермаслиги ҳақида айтаётгани сабабли, бу тобора кучайиб бормоқда.
Қайд этилишича, музлатилган конфликт АҚШ ва Украинанинг бошқа ҳамкор давлатлари учун сиёсий жиҳатдан мақбул узоқ муддатли натижа бўлиши мумкин, чунки бу Киевни қўллаб-қувватлаш харажатларини камайтиради. Бунинг эвазига Украинага АҚШ ва НАТО билан узоқ муддатли хавфсизлик алоқалари таклиф қилиниши мумкин.
Нашр суҳбатдошларидан бири бир вақтнинг ўзида вазият ривожланишининг бир нечта сценарийларини режалаштириш Вашингтонга хос эканини таъкидлайди.
“Баъзи америкалик расмийлар ва таҳлилчиларнинг айтишича, қўпол моделлардан бири Корея уруши бўлиши мумкин. Ушбу можародаги фаол жанговар ҳаракатлар 1953 йилда сулҳ билан якунланган, бироқ 70 йил ўца ҳам уруш расман тугагани эълон қилинмаган”, — дейилади хабарда.
Изоҳ (0)