Birlashgan Millatlar Tashkiloti ma’lumotlariga ko‘ra, insonparvarlik yordami va Sudan xalqini qo‘llab-quvvatlash uchun 3 milliard dollardan ortiq mablag‘ kerak, deb yozadi Euronews.
BMT rejasi bir oydan ortiq vaqtdan beri harbiy to‘qnashuvlar davom etayotgan mamlakatdagi 18 million kishiga yordam berishga qaratilgan.
“Sudandagi inqiroz shiddat bilan mintaqaviy inqirozga aylanib bormoqda. Sudanliklar eng asosiy narsalar: himoya, tibbiy yordam, oziq-ovqat va suv, sanitariya, uy-joyga muhtoj. Tobora kuchayib borayotgan bu tartibsizlikda ayniqsa, bolalarning ahvoli og‘ir”, — dedi BMTning gumanitar bo‘limi rahbari Ramesh Rajasingxam.
15-aprel kuni Sudan poytaxti Xartum va mamlakatning boshqa shaharlarida armiya va harbiylashtirilgan guruh – “Tezkor harakat kuchlari” o‘rtasida qurolli to‘qnashuvlar boshlandi. Yuzlab odamlar halok bo‘ldi, bir necha ming fuqaro Sudanni tark etdi.
Mojaro nima sababdan boshlandi?
Qurolli mojaro mamlakatning amaldagi prezidenti, muntazam armiyani nazorat qiluvchi general Abdul Fattoh al-Burxon va uning o‘rinbosari, “Tezkor harakat kuchlari” qo‘mondoni general Muhammad Hamdan Dagalo o‘rtasidagi munosabatlarning keskinlashishi natijasida yuzaga kelgan.
Ular 2021-yil oktabrda davlat to‘ntarishi natijasida hokimiyatga kelgandi, ammo asta-sekin davlatni boshqarish bo‘yicha kelishmovchilik kelib chiqib, fuqarolik boshqaruviga o‘tish taklif qilindi.
Qarama-qarshilikning keskin bosqichi Dagalo 100 mingga yaqin odamni tashkil etuvchi “Tezkor harakat kuchlarini” butun mamlakat bo‘ylab joylashtirganidan keyin boshlandi, al-Burxon buni tahdid sifatida qabul qildi.
Har ikki tomon Xartumdagi muhim obyektlar ustidan nazoratni qo‘lga olganini da’vo qilmoqda, ammo kim nimani nazorat qilayotgani to‘liq ma’lum emas. Asosiy janglar shahar markazida joylashgan Xartum aeroporti hududida kechayotgani xabar qilingan.
Izoh (0)