Ukraina yirik davlatlar o‘rtasidagi qarama-qarshilikda front chizig‘iga aylanmasligi kerak, dedi Xitoy Tashqi ishlar vaziri vakili Van Venbin “TASS” agentligiga.
Xitoylik amaldor AQSH sobiq davlat kotibi Genri Kissinjerning Ukrainani NATOga qabul qilish haqidagi taklifiga shunday munosabat bildirdi.
“Xitoyning Ukraina masalasidagi pozitsiyasi har doim aniq bo‘lib kelgan: biz Ukraina yirik davlatlar o‘rtasidagi qarama-qarshilikda front chizig‘iga aylanmasligi kerak, deb hisoblaymiz”, — dedi Van Venbin.
U barcha tomonlarni vazminlikni saqlashga va inqirozni yanada kuchaytiradigan harakatlardan tiyilishga chaqirdi.
Kissinjerning taklifiga Rossiya sobiq prezidenti, amaldagi Xavfsizlik Kengashi rahbari o‘rinbosari Dmitriy Medvedev ham javob qaytardi.
Uning aytishicha, alyansning Rossiya bilan gibrid urushi kontekstida Ukrainani NATOga qabul qilish taklifi va Kiyevning yo‘qotilgan hududlarni qaytarib olish istagi Vashington jamoaviy mudofaa shartnomasining beshinchi moddasini faollashtiradi.
5-moddada NATOning bir aʼzosiga hujum butun NATOga qilingan hujum bo‘lib, alyansning barcha aʼzolari javobini keltirib chiqarishi belgilab qo‘yilgan. Ammo ushbu moddani qo‘llash bo‘yicha qaror NATO a’zolari o‘rtasidagi maslahatlashuvlardan so‘ng qabul qilinadi.
Medvedevning ta’kidlashicha, agar Ukraina NATOga qabul qilinsa va alyans Rossiya bilan bevosita ziddiyatda bo‘lgan davlatni jamoaviy mudofaa qilishga o‘tsa, Moskva “barcha ehtimoliy vositalar bilan qattiq javob qaytarish”ga majbur bo‘ladi.
99 yoshli Genri Kissinjer The Economist nashriga bergan intervyusida Ukrainani Rossiya bilan hozirgi va kelgusidagi mojarolardan himoya qilish, mamlakatni hududiy bahslardan yiroq tutish uchun uni NATOga qabul qilish kerakligi, chunki “mamlakat rahbariyatining o‘zi tajribasiz” ekanini aytgandi.
Ukraina 2022-yil sentabrida NATOga qo‘shilish uchun ariza topshirgan. Yangi davlatlarni qabul qilish uchun ittifoqning barcha a’zolari roziligi talab qilinadi.
NATOga aʼzo davlatlarning navbatdagi sammiti iyul oyida Litvada bo‘lib o‘tadi. Aprel oyida NATO bosh kotibi Yens Stoltenberg kelgusida Ukrainaning alyansga a’zo bo‘lishi masalasida barcha ittifoqchilar kelishib olganini ma’lum qilgandi. Uning so‘zlariga ko‘ra, hozir NATOning asosiy maqsadi Ukrainaning Rossiya bilan urushda g‘alaba qozonishini ta’minlashdan iborat.
Izoh (0)