O‘zbekiston elchixonasi xodimlari Saudiya Arabistoni Atrof-muhit, suv va qishloq xo‘jaligi vazirligining Qishloq xo‘jaligi tadqiqotlari va qishloq xo‘jaligini kengaytirish departamenti bosh direktori Bandar Muhammad al-Saqhan bilan uchrashuv o‘tkazdi. Bu haqda “Dunyo” agentligi xabar berdi.
Uchrashuvdan maqsad O‘zbekistonda qishloq xo‘jaligi sohasida, jumladan, gul yetishtirish yo‘nalishida ishlab chiqilayotgan istiqbolli investitsiya loyihalariga saudiyalik investorlarni jalb etish va tegishli shartnomalarni imzolashdan iborat.
Suhbat avvalida Bandar al-Saqhan Saudiya Arabistoni va O‘zbekiston o‘rtasidagi hamkorlik aloqalari izchil rivojlanib borayotgani va bunda ikki davlat rahbarlarining siyosiy irodasi, xususan, O‘zbekiston prezidentining 2022-yilda ushbu mamlakatga amalga oshirgan rasmiy tashrifi muhim o‘rin tutayotganini taʼkidlangan. U, shuningdek, mamlakat ishbilarmonlarining mazkur loyihalarga katta qiziqish bildirayotganini alohida qayd etgan.
“Saudiya tomoni O‘zbekiston bilan gul yetishtirish bo‘yicha hamkorlik qilishdan manfaatdor. Bu borada Saudiya Arabistoni Atrof-muhit, suv va qishloq xo‘jaligi vazirligining 5 nafar masʼul xodimi va 10 nafardan ziyod investorlarni gul yetishtirish bo‘yicha loyihalarga investitsiyalar kiritish maqsadida O‘zbekistonga biznes-missiya bilan yuborishga tayyormiz”, — deydi Bandar Muhammad al-Saqhan.
Ushba loyihalar respublikaning tuproq-iqlim sharoitiga mos 6 ta viloyatida, jumladan, Toshkent, Jizzax, Samarqand, Namangan, Farg‘ona va Andijon viloyatlarida amalga oshirish ko‘zda tutilgan.
Ishchi safar doirasida saudiyalik investorlar va mamlakatimiz ishbilarmonlari o‘rtasida bir qator shartnomalar imzolanishi rejalashtirilgan.
Aprel oxirlarida Saudiyaning ACWA Power energetika kompaniyasi O‘zbekistonda Osiyo taraqqiyot bankining (OTB) 174 million dollarlik krediti hisobidan ikkita shamol elektr stansiyasini qurishi ma’lum bo‘lgandi.
Izoh (0)