Ўзбекистон элчихонаси ходимлари Саудия Арабистони Атроф-муҳит, сув ва қишлоқ хўжалиги вазирлигининг Қишлоқ хўжалиги тадқиқотлари ва қишлоқ хўжалигини кенгайтириш департаменти бош директори Бандар Муҳаммад ал-Сақҳан билан учрашув ўтказди. Бу ҳақда “Дунё” агентлиги хабар берди.
Учрашувдан мақсад Ўзбекистонда қишлоқ хўжалиги соҳасида, жумладан, гул етиштириш йўналишида ишлаб чиқилаётган истиқболли инвестиция лойиҳаларига саудиялик инвесторларни жалб этиш ва тегишли шартномаларни имзолашдан иборат.
Суҳбат аввалида Бандар ал-Сақҳан Саудия Арабистони ва Ўзбекистон ўртасидаги ҳамкорлик алоқалари изчил ривожланиб бораётгани ва бунда икки давлат раҳбарларининг сиёсий иродаси, хусусан, Ўзбекистон президентининг 2022 йилда ушбу мамлакатга амалга оширган расмий ташрифи муҳим ўрин тутаётганини таъкидланган. У, шунингдек, мамлакат ишбилармонларининг мазкур лойиҳаларга катта қизиқиш билдираётганини алоҳида қайд этган.
“Саудия томони Ўзбекистон билан гул етиштириш бўйича ҳамкорлик қилишдан манфаатдор. Бу борада Саудия Арабистони Атроф-муҳит, сув ва қишлоқ хўжалиги вазирлигининг 5 нафар масъул ходими ва 10 нафардан зиёд инвесторларни гул етиштириш бўйича лойиҳаларга инвестициялар киритиш мақсадида Ўзбекистонга бизнес-миссия билан юборишга тайёрмиз”, — дейди Бандар Муҳаммад ал-Сақҳан.
Ушба лойиҳалар республиканинг тупроқ-иқлим шароитига мос 6 та вилоятида, жумладан, Тошкент, Жиззах, Самарқанд, Наманган, Фарғона ва Андижон вилоятларида амалга ошириш кўзда тутилган.
Ишчи сафар доирасида саудиялик инвесторлар ва мамлакатимиз ишбилармонлари ўртасида бир қатор шартномалар имзоланиши режалаштирилган.
Апрель охирларида Саудиянинг АCWА Power энергетика компанияси Ўзбекистонда Осиё тараққиёт банкининг (ОТБ) 174 миллион долларлик кредити ҳисобидан иккита шамол электр станциясини қуриши маълум бўлганди.
Изоҳ (0)