O‘zbekistonda 27—28-aprel kunlari o‘tkazilgan Ikkinchi Toshkent Xalqaro investitsiya forumi (TXIF-2023) o‘z yakuniga yetdi.
TXIF-2023da dunyoning 70 mamlakatidan 2,5 mingdan oshiq ishtirokchi qatnashdi. 2022-yilgi forumga 50 mamlakatdan 1,5 ming nafar mehmon tashrif buyurgan edi.
Agar birinchi forum doirasida jami 7,8 mlrd dollarlik 105 ta hujjat imzolangan bo‘lsa, joriy yilda TXIF-2023 doirasida 164 ta kelishuv va shartnoma imzolandi, ularning umumiy qiymati 11 mlrd dollarga yetdi.
Investitsiyalar, sanoat va savdo vazirligi va Turkiyaning Cngiz Enerji San. ve Tic A.Ş. kompaniyasi o‘rtasida qiymati 300 mln dollarga teng Jizzax viloyatida quvvati 400 MVt bo‘lgan bug‘-gaz elektr stansiyasi qurish bo‘yicha investitsiya shartnomasi tuzildi.
Bundan tashqari, vazirlik Xitoyning China Gezhouba Group Overseas Investment kompaniyasi bilan Buxoro viloyatida quyosh elektr stansiyalarini qurish bo‘yicha investitsiya shartnomasi imzoladi. Loyihaning qiymati 500 mln dollar bo‘lib, quyosh elektr stansiyasining quvvati 500 MVt bo‘lishi belgilangan.
-28.jpg)
Shuningdek, Qurilish va uy-joy kommunal xo‘jaligi vazirligi hamda Saudiya Arabistoni Qirolligining Mowah kompaniyasi o‘rtasida qiymati 90 mln dollarga teng Urganch shahrida issiqlik ta’minoti tizimlarini DXSH asosida rivojlantirishi bo‘yicha memorandum imzolandi.
Tabiat resurslari vazirligi va Koreyaning Sejin G&E So kompaniyasi o‘rtasida qiymati 55 mln dollarga teng maishiy chiqindilar poligonlarida hosil bo‘ladigan chiqindi gazini qayta ishlash hisobiga elektr energiyasi ishlab chiqarish investitsiya loyihasi bo‘yicha kelishuv amalga oshirildi.
“Agrobank” hamda Germaniyaning “Commerzbank AG” banki o‘rtasida qiymati 20 mln savdoni moliyalashtirish bo‘yicha kelishuv imzolandi.
Bundan tashqari, “Agrobank” hamda Germaniyaning “KFW IPEX-Bank” banki bilan ham 30 mln dollarga teng savdoni moliyalashtirish bo‘yicha kelishuvga erishdi.
Mehmonxona sohasida Hyper Partners kompaniyasi va Rossiyaning Russian Management Hotel Company LLC korxonasi o‘rtasida besh yulduzli Premium toifadagi mehmonxonalarni qurish bo‘yicha kelishuv bitimi imzolandi.
Qishloq xo‘jaligi vazirligi Fransiyaning SLT kompaniyasi bilan 6 mln dollarlik investitsiya shartnomasini imzoladi. Kompaniya O‘zbekistondagi sut va sut mahsulotlari ishlab chiqaradigan mahalliy zavodni sotib olishni rejalashtirmoqda.
Farmatsevtika sanoatini rivojlantirish agentligi Xitoyning Youdi Biotech kompaniyasi bilan Toshkentdagi Pharma Park klasterida dori-darmon ishlab chiqaruvchi zavod qurishga kelishib oldi. Loyiha 40 mln dollarga baholandi.
"O‘zbek geologiya qidiruv" kompaniyasi hamda Rossiyaning "Oltin Kon" qo‘shma korxonasi o‘rtasida qiymati 18 mln dollarlik Kuljuktov tog‘ massivini geologik o‘rganish to‘g‘risida bitim imzolandi.
Shuningdek, shartnomalar imzolangan yirik kompaniyalar ro‘yxatida Gezhouba Invest (Xitoy), Cengiz Energy (Turkiya), AL Bawani Company va Sajco (SAP), Lasselsberger Group (Avstriya), Dewan Cement (Pokiston), Mareven Food (Vyetnam), Landesbank (Germaniya), Cadila Pharmaceuticals (Hindiston) ham bor.
Ma’lum bo‘lishicha, erishilgan kelishuvlarni o‘z vaqtida va sifatli amalga oshirish maqsadida “yo‘l xaritasi” ishlab chiqildi. Unda har bir loyihaning ijrochilari va amalga oshirish muddatlari belgilab qo‘yildi.
Izoh (0)