Saudiya Arabistonida 2023-yilgi Haj mavsumi boshlanishi munosabati bilan Umra ziyorati bir muddatga qoldirildi. Bu haqda O‘zbekiston Umra ziyoratlari Assotsiatsiyasi “Daryo”ga maʼlum qildi.
Assotsiatsiya vakilining aytishicha, Saudiya Arabistoni Podshohligi 5-maydan Umra safariga viza berishni to‘xtatgan.
“Doimiy tartib shunday. Umra safariga viza berilishi Muharram oyigacha yaʼni 20-iyulgacha to‘xtatilgan. Bu haqda Saudiya Arabistoni Podshohligi Haj va umra ishlari vazirligi rasman eʼlon bermagan bo‘lsa-da, amalda viza berish to‘xtatildi”, — deyiladi Assotsiatsiya axborotida.
Qo‘shimcha qilinishicha, 15-maydan eʼtiboran Makka shahriga kirish ham rasman to‘xtatiladi va faqatgina Makkada yashash ruxsatnomasi bor insonlargina shaharga kiritiladi.
Maʼlumot uchun, 2019-yilda 2,6 millionga yaqin kishi Haj ziyoratini ado etgan. Biroq pandemiya fonida qirollik rasmiylari 2020 va 2021-yillarda faqat cheklangan miqdordagi ziyoratchilarga, 2022-yilda esa 1 million kishiga Hajga kelishga ruxsat bergan. Shu bilan birga, 2022-yilda faqat 18 yoshdan 65 yoshgacha bo‘lgan, to‘liq emlangan yoki koronavirusga qarshi immunitetga ega, surunkali kasalliklari bo‘lmagan shaxslar Haj ziyoratini ado etishi mumkin edi. Keyinchalik bu cheklov olib tashlandi.
2022-yilda O‘zbekistonda 12 ming 45 nafar ziyoratchi Haj amallarini, 61 mingdan ortiq ziyoratchi Umra amallarini ado etgan. Joriy yilgi ramazon oyida 1400 nafar kam ta‘minlangan fuqaro umra ziyoratiga yuborilgan.