Jahon sog‘liqni saqlash tashkiloti Marshall orollari va Mikroneziyada Hindistonda ishlab chiqarilgan xavfli yo‘tal siropi yuki topilganini ma’lum qildi. Bu haqda BBC xabar berdi.
JSST Panjob QP Pharmachem Ltd tomonidan ishlab chiqarilgan Guaifenesin TG siropining sinovdan o‘tkazilgan namunalarida “qabul qilib bo‘lmaydigan miqdorda dietilen glikol va etilen glikol” borligini ta’kidladi.
Sirop tarkibidagi ikkala birikma ham odamlar uchun zaharli va iste’mol qilingan taqdirda o‘limga olib kelishi mumkin. JSST bayonotida kimdir preparat oqibatida kasal bo‘lgan-bo‘lmaganiga aniqlik kiritilmagan.
JSSTning mazkur ogohlantirishi Hindistonda ishlab chiqarilgan “Dok-1 Maks” yo‘tal siroplari Gambiya va O‘zbekistonda bolalar o‘limiga olib kelganidan keyingisi hisoblanadi.
QP Pharmachem Ltd boshqaruv direktori Sudhir Pazakning aytishicha, kompaniya barcha tartibga soluvchi ruxsatlarni olgandan keyin 18 346 ta sirop partiyasini Kambodjaga eksport qilgan. U mazkur mahsulot Marshall orollari va Mikroneziyaga qanday yetib kelganini bilmasligini aytdi.
“Biz dorilarni Tinch okeani mintaqasiga jo‘natmaganmiz va ular u yerda foydalanish uchun sertifikatlanmagan. Siroplar Marshall orollari va Mikroneziyaga qanday sharoitda yetib kelganini bilmaymiz”, — degan u.
Shuningdek, Pazak uning kompaniyasi dori-darmonlar partiyasini Kambodjaga eksport qilgan firmaga qonuniy bildirishnoma yuborganini aytdi.
JSST bayonotida aytilishicha, ko‘krak qafasidagi yo‘tal alomatlarini yo‘qotish uchun ishlatiladigan mahsulot Avstraliya dori vositalari boshqarmasi, Terapevtik tovarlar boshqarmasi tomonidan sinovdan o‘tgan.
Sirop Haryana shtatida joylashgan Trillium Pharma tomonidan sotilgan. Trillium vakili va Hindiston hukumati mazkur xabarga munosabat bildirmagan.
“Na ko‘rsatilgan ishlab chiqaruvchi, na sotuvchi JSSTga ushbu mahsulotlarning xavfsizligi va sifati bo‘yicha kafolat bermagan”, — deyiladi tashkilot bayonotida.
Nega Hindistonda ishlab chiqarilgan dorilar xavfsizlik bilan bog‘liq muammolarni keltirib chiqarmoqda?
Hindiston rivojlanayotgan mamlakatlarning tibbiy ehtiyojlarining katta qismini qondiradigan umumiy dori vositalarining dunyodagi eng yirik eksportchisi hisoblanadi.
Ammo so‘nggi oylarda ko‘plab hind firmalari o‘z dori-darmonlarining sifati uchun tekshiruvdan o‘tmoqda va mutaxassislar ushbu preparatlarning ishlab chiqarish amaliyotidan tashvishlanmoqda.
Oktyabr oyida JSST global ogohlantirishni e’lon qilgan va Maiden Pharmaceuticals tomonidan ishlab chiqarilgan to‘rtta yo‘tal siropi Gambiyada buyrak shikastlanishidan 66 bolaning o‘limiga olib kelganini aytgan.
Hindiston hukumati ham, Maiden Pharmaceuticals kompaniyasi ham bu ayblovlarni rad etgan.
Mart oyida Hindiston yo‘tal siroplari O‘zbekistonda bolalarning o‘limiga aloqador bo‘lgan firmaning ishlab chiqarish litsenziyasini bekor qilgan.
O‘zbekistonda “Dok-1 Maks” siropining iste’mol qilinishi oqibatlari
Hindistonda ishlab chiqarilgan “Dok-1 Maks” siropini iste’mol qilish ortidan O‘zbekistonda 20 nafardan ortiq bola vafot etgani ma’lum qilingan.
Davlat xavfsizlik xizmati tomonidan “Dok-1 Maks” preparati bilan bog‘liq holat yuzasidan jinoyat ishi qo‘zg‘atilgan. O‘zbekistonda “Dok-1 Maks”ni ishlab chiqargan kompaniyaga tegishli barcha dorilar savdosi vaqtincha to‘xtatildi.
Shavkat Mirziyoyev 30-dekabrdagi yig‘ilishda Farmatsevtika tarmog‘ini rivojlantirish agentligi rahbari Sardor Kariyev ishdan olgan. Sardor Kariyev 2019-yilning fevralidan buyon Sog‘liqni saqlash vazirligi huzuridagi Farmatsevtika tarmog‘ini rivojlantirish agentligi direktori lavozimida faoliyat yuritib kelayotgandi.
JSST O‘zbekistonda “Dok-1 Maks” dorisidan bolalar o‘lgani yuzasidan munosabat bildirgan. Hindiston hukumati esa “Dok-1 Maks” dorisini ishlab chiqaruvchi kompaniyaning litsenziyasini to‘xtatgan. Hindistonda “Dok-1 Maks” dorisini ishlab chiqargan zavod ustidan tekshiruvning dastlabki natijalari e’lon qilingan.
Sirop bilan bog‘liq o‘lim holati boshqa davlatlarda ham aniqlangani ma’lum bo‘ldi, biroq ular aynan qaysi preparatlar oqibatida ekani aytilmagan. Jumladan, Indoneziyada 2022-yildan beri 200 ga yaqin bola sirop iste’mol qilishi ortidan yuzaga kelgan o‘tkir buyrak shikastlanishidan vafot etgan. Gambiyada ham bolalar Hindiston farmatsevtika kompaniyasi tomonidan ishlab chiqilgan yo‘talga qarshi siropni iste’mol qilishi ortidan o‘lgan.
Izoh (0)