“Qamoqda emas”: Sudanning hokimiyatdan ag‘darilgan prezidenti qayerdaligi ma’lum bo‘ldi

Sudanning hokimiyatdan ag‘darilgan prezidenti Umar al-Bashir armiya va Tezkor qo‘llab-quvvatlash kuchlari o‘rtasida to‘qnashuv boshlanganidan keyin Xartumdagi harbiy gospitalda saqlanmoqda. Bu haqda Al Jazeera xabar berdi.

Ma’lum qilinishicha, Al-Bashir va 30 ga yaqin boshqa mahbuslar Kober qamoqxonasidagi tibbiy xodimlar tavsiyasiga asosan Aliya gospitaliga ko‘chirilgan. Al-Bashir sobiq hukumatining boshqa a’zolari bilan birga Xartumdagi qamoqxonada saqlanayotgandi.

Ikki harbiy guruh o‘rtasidagi janglar paytida qamoqxona hujumga uchragan, bu esa yakshanba kuni minglab mahbuslarning qamoqdan qochib ketishiga olib kelgan.

“Bashirning oila a’zolari mamlakatda to‘qnashuvlar tugaganidan keyin u sudga borishi va aybsizligini isbotlashi kerakligini aytdi”, — deydi Al Jazeera muxbiri Hiba Morgan.

2019-yil apreldagi harbiy to‘ntarishdan so‘ng Umar al-Bashir hokimiyatdan chetlatilgan. U 30 yildan ortiq davlat rahbari lavozimida ishlagan. To‘ntarish butun mamlakatni qamrab olgan norozilik namoyishlari fonida yuz berdi. Namoyishchilar al-Bashir hukumatidan narxlarni pasaytirishga erishishni, shuningdek, har hafta sodir bo‘ladigan elektr ta’minotidagi uzilishlar muammosini hal qilishni talab qilgan.

2008-yilning 21-iyulida Gaaga sudi al-Bashirni Darfurdagi mojaroga aloqador genotsidda ayblab, hibsga olish uchun order berdi. Shunday qilib, al-Bashir xalqaro adliya organi tomonidan ayblangan dunyodagi birinchi amaldagi prezidentga aylangan.

Joriy yilning aprel oyi o‘rtalarida suveren kengash (mamlakat boshqaruv organi)ni boshqarayotgan Abdul Fattoh al-Burxon va uning o‘rinbosari Muhammad Daglo o‘rtasidagi kelishmovchilik tufayli mamlakatdagi vaziyat keskinlashdi. 15-aprel kuni ertalab Meroye shahridagi harbiy baza yaqinida va poytaxt Xartumda armiya hamda tezkor harakat kuchlari o‘rtasida to‘qnashuvlar boshlandi.

21-aprel kuni Jahon sog‘liqni saqlash tashkiloti (JSST) vakili Margaret Xarris brifingda Sudandagi to‘qnashuvlarda halok bo‘lganlar soni 400 kishidan oshganini, mamlakatda 3,5 mingdan ortiq kishi jarohatlanganini aytdi.