Жаҳон соғлиқни сақлаш ташкилоти Маршалл ороллари ва Микронезияда Ҳиндистонда ишлаб чиқарилган хавфли йўтал сиропи юки топилганини маълум қилди. Бу ҳақда BBC хабар берди.
ЖССТ Panjob QP Pharmachem Ltd томонидан ишлаб чиқарилган Guaifenesin TG сиропининг синовдан ўтказилган намуналарида “қабул қилиб бўлмайдиган миқдорда диэтилен гликол ва этилен гликол” борлигини таъкидлади.
Сироп таркибидаги иккала бирикма ҳам одамлар учун заҳарли ва истеъмол қилинган тақдирда ўлимга олиб келиши мумкин. ЖССТ баёнотида кимдир препарат оқибатида касал бўлган-бўлмаганига аниқлик киритилмаган.
ЖССТнинг мазкур огоҳлантириши Ҳиндистонда ишлаб чиқарилган “Док-1 Макс” йўтал сироплари Гамбия ва Ўзбекистонда болалар ўлимига олиб келганидан кейингиси ҳисобланади.
QP Pharmachem Ltd бошқарув директори Судҳир Пазакнинг айтишича, компания барча тартибга солувчи рухсатларни олгандан кейин 18 346 та сироп партиясини Камбоджага экспорт қилган. У мазкур маҳсулот Маршалл ороллари ва Микронезияга қандай етиб келганини билмаслигини айтди.
“Биз дориларни Тинч океани минтақасига жўнатмаганмиз ва улар у ерда фойдаланиш учун сертификатланмаган. Сироплар Маршалл ороллари ва Микронезияга қандай шароитда етиб келганини билмаймиз”, — деган у.
Шунингдек, Пазак унинг компанияси дори-дармонлар партиясини Камбоджага экспорт қилган фирмага қонуний билдиришнома юборганини айтди.
ЖССТ баёнотида айтилишича, кўкрак қафасидаги йўтал аломатларини йўқотиш учун ишлатиладиган маҳсулот Австралия дори воситалари бошқармаси, Терапевтик товарлар бошқармаси томонидан синовдан ўтган.
Сироп Ҳаряна штатида жойлашган Тrillium Pharma томонидан сотилган. Тrillium вакили ва Ҳиндистон ҳукумати мазкур хабарга муносабат билдирмаган.
“На кўрсатилган ишлаб чиқарувчи, на сотувчи ЖССТга ушбу маҳсулотларнинг хавфсизлиги ва сифати бўйича кафолат бермаган”, — дейилади ташкилот баёнотида.
Нега Ҳиндистонда ишлаб чиқарилган дорилар хавфсизлик билан боғлиқ муаммоларни келтириб чиқармоқда?
Ҳиндистон ривожланаётган мамлакатларнинг тиббий эҳтиёжларининг катта қисмини қондирадиган умумий дори воситаларининг дунёдаги энг йирик экспортчиси ҳисобланади.
Аммо сўнгги ойларда кўплаб ҳинд фирмалари ўз дори-дармонларининг сифати учун текширувдан ўтмоқда ва мутахассислар ушбу препаратларнинг ишлаб чиқариш амалиётидан ташвишланмоқда.
Октябр ойида ЖССТ глобал огоҳлантиришни эълон қилган ва Maiden Pharmaceuticals томонидан ишлаб чиқарилган тўртта йўтал сиропи Гамбияда буйрак шикастланишидан 66 боланинг ўлимига олиб келганини айтган.
Ҳиндистон ҳукумати ҳам, Maiden Pharmaceuticals компанияси ҳам бу айбловларни рад этган.
Март ойида Ҳиндистон йўтал сироплари Ўзбекистонда болаларнинг ўлимига алоқадор бўлган фирманинг ишлаб чиқариш лицензиясини бекор қилган.
Ўзбекистонда “Док-1 Макс” сиропининг истеъмол қилиниши оқибатлари
Ҳиндистонда ишлаб чиқарилган “Док-1 Макс” сиропини истеъмол қилиш ортидан Ўзбекистонда 20 нафардан ортиқ бола вафот этгани маълум қилинган.
Давлат хавфсизлик хизмати томонидан “Док-1 Макс” препарати билан боғлиқ ҳолат юзасидан жиноят иши қўзғатилган. Ўзбекистонда “Док-1 Макс”ни ишлаб чиқарган компанияга тегишли барча дорилар савдоси вақтинча тўхтатилди.
Шавкат Мирзиёев 30 декабрдаги йиғилишда Фармацевтика тармоғини ривожлантириш агентлиги раҳбари Сардор Кариев ишдан олган. Сардор Кариев 2019 йилнинг февралидан буён Соғлиқни сақлаш вазирлиги ҳузуридаги Фармацевтика тармоғини ривожлантириш агентлиги директори лавозимида фаолият юритиб келаётганди.
ЖССТ Ўзбекистонда “Док-1 Макс” дорисидан болалар ўлгани юзасидан муносабат билдирган. Ҳиндистон ҳукумати эса “Док-1 Макс” дорисини ишлаб чиқарувчи компаниянинг лицензиясини тўхтатган. Ҳиндистонда “Док-1 Макс” дорисини ишлаб чиқарган завод устидан текширувнинг дастлабки натижалари эълон қилинган.
Сироп билан боғлиқ ўлим ҳолати бошқа давлатларда ҳам аниқлангани маълум бўлди, бироқ улар айнан қайси препаратлар оқибатида экани айтилмаган. Жумладан, Индонезияда 2022 йилдан бери 200 га яқин бола сироп истеъмол қилиши ортидан юзага келган ўткир буйрак шикастланишидан вафот этган. Гамбияда ҳам болалар Ҳиндистон фармацевтика компанияси томонидан ишлаб чиқилган йўталга қарши сиропни истеъмол қилиши ортидан ўлган.
Изоҳ (0)