Hindistonning Uttar-Pradesh shtati hukumati O‘zbekistonda bolalar o‘limiga sabab bo‘lgan “Dok-1 Maks” dorisini ishlab chiqaruvchi Marion Biotech Pvt. Ltd kompaniyasining litsenziyasini bekor qildi. Bu haqda Press Trust of India nashri xabar berdi.
“Firmaning litsenziyasi faoliyati yanvar oyida to‘xtatilgan edi, shundan keyin tergov harakatlari boshlangandi. Firma litsenziyasi Uttar-Pradesh shtati oziq-ovqat xavfsizligi va dori vositalarini boshqarish departamenti tomonidan bekor qilindi. Firma endilikda yo‘talga qarshi siroplarni ishlab chiqara olmaydi”, — deydi hukumat amaldori.
Uning so‘zlariga ko‘ra, 3-mart kuni shtat politsiyasi Marion Biotech’ning uch nafar xodimini hibsga olgan, firmaning ikki direktoriga esa jinoyat ishi qo‘zg‘atilgani to‘g‘risida xabarnoma jo‘natilgan. Mamlakat Jinoyat kodeksining dori vositalarini qalbakilashtirish, dori vositalari savdosini qalbakilashtirish, shuningdek, noto‘g‘ri markirovkali dori vositalari to‘g‘risidagi moddalari bilan da’vo arizasi kiritilgan.
Tergov davomida davlat laboratoriyasida o‘tkazilgan test yakunlariga ko‘ra, Marion Biotech dorilari “qalbakilashtirilgani” va sifat standartlariga mos kelmasligi aniqlangan edi.
Hindistonda ishlab chiqarilgan “Dok-1 Maks” siropini iste’mol qilish ortidan O‘zbekistonda 20 dan ortiq bola vafot etgandi. Yanvar boshlarida Marion Biotech Pvt. Ltd kompaniyasining litsenziyasi to‘xtatib qo‘yilgan edi. Marion Biotech asoschilari Noida zavodida har xil turdagi dori-darmonlarni ishlab chiqarish uchun ikkita: Form 25 va Form 28 litsenziyalariga ega bo‘lgan.
Izoh (0)