Jahon sog‘liqni saqlash tashkiloti (JSST) O‘zbekistonda “DOK-1 Maks” siropini qabul qilish ortidan vafot etgan bolalar o‘limi yuzasidan O‘zbekiston rasmiylari bilan aloqadaligini ma’lum qildi. Bu haqda ANI news xabar berdi.
“Biz O‘zbekiston rasmiylari bilan aloqadamiz. Hali ham ma’lumot yig‘ish va ularni tasdiqlash jarayonidamiz”, — deya JSST nashrga ma’lumot berdi.
Hindiston hukumati “Dok-1 Maks” dorisini ishlab chiqargan Marion Biotech kompaniyasiga qarshi surishtiruv boshlagan, kompaniya “Dok-1 Maks” dorisini ishlab chiqarishi to‘xtatilgan. Surishtiruv Hindistonning Uttar-Pradesh shtatidagi preparatlarni litsenziyalash va nazorat qilish boshqarmasi tomonidan olib borilmoqda. Ular O‘zbekiston hukumatidan ham ushbu dori oqibatida vafot etgan bolalar haqida hisobot so‘ragan.
“Vafot etganlar uchun afsusdamiz, hukumat tergov olib bormoqda. Uning natijalaridan kelib chiqib, tegishli choralarni ko‘ramiz. Namunalar olindi. Bu mahsulotni ishlab chiqarish to‘xtatildi, qolgan jarayonlar davom etmoqda”, — degan Marion Biotech kompaniyasi rahbari Hasan Rizo ANI bilan suhbatda.
29-dekabrda Hindistonning Toshkentdagi elchixonasi “Dok-1 Maks” siropini iste’mol qilish ortidan O‘zbekistonda bolalar vafot etganiga hamdardlik bildirib, voqeani kuzatib borishini ta’kidlagan.
ANI news’ning ta’kidlashicha, Hindiston Sog‘liqni saqlash vazirligi 27-dekabrdan buyon O‘zbekiston rasmiylari bilan muntazam aloqada.
Eslatib o‘tamiz, Hindistonda ishlab chiqarilgan “Dok-1 Maks” siropini iste’mol qilish ortidan hozircha Samarqandda 18 nafar, Qashqadaryoda bir nafar, jami 19 nafar bola vafot etgani ma’lum qilingan.
Davlat xavfsizlik xizmati tomonidan “Dok-1 Maks” preparati bilan bog‘liq holat yuzasidan jinoyat ishi qo‘zg‘atilgan. O‘zbekistonda “Dok-1 Maks”ni ishlab chiqargan kompaniyaga tegishli barcha dorilar savdosi vaqtincha to‘xtatildi.
Shavkat Mirziyoyev 30-dekabrdagi yig‘ilishda Farmatsevtika tarmog‘ini rivojlantirish agentligi rahbari Sardor Kariyev ishdan oldi. Prezident yig‘ilishda sog‘liqni saqlash sohasiga to‘xtalib, “Dok-1 Maks” preparatini qabul qilish oqibatida bolalar hayotdan ko‘z yumgani bilan bog‘liq vaziyatni qattiq tanqid qildi.
“Samarqand va Qashqadaryodagi bolalar o‘limi sohada ishlar ahvolini, nazorat yo‘qligini ko‘rsatdi. Bugun Farmatsevtika agentligi rahbari Kariyevni ishdan oldim. Bunga yo‘l qo‘ygan mutasaddilarning hammasi qonun oldida javob beradi!”, — dedi prezident.
Sardor Kariyev 2019-yilning fevralidan buyon Sog‘liqni saqlash vazirligi huzuridagi Farmatsevtika tarmog‘ini rivojlantirish agentligi direktori lavozimida faoliyat yuritib kelayotgandi.
Izoh (0)