Indoneziyada 2022-yildan beri 200 ga yaqin bola sirop iste’mol qilishi ortidan yuzaga kelgan o‘tkir buyrak shikastlanishi tufayli vafot etdi. Bu haqda Reuters xabar berdi.
Rasmiylar parasetamol asosidagi sirop tarkibida aniqlangan ikki xavfli tarkibiy qism: etilen glikol va dietilen glikol o‘limga sabab bo’lganini ma’lum qildi. O‘zbekistonda ham bolalarning “Dok-1 Maks” siropidan o‘lishiga sirop tarkibidagi dietilen glikol va/yoki etilen glikol mavjudligi sabab bo‘lgandi. Mazkur moddalar toksik bo‘lib, o‘tkir buyrak shikastlanishiga olib keladi. Ba’zi farmatsevtika mahsulotlarida bu modda arzonroq alternativ sifatida ishlatilinadi.
Indoneziyada bolalarning preparat qabul qilishi ortidan o‘lgani sababli yigirma beshta oila hozirda sog‘liqni saqlash va moliya vazirliklari, mamlakatning dori vositalarini tartibga soluvchi organi va kamida sakkizta farmatsevtika kompaniyasini sudga bergan. Bu oilalardan biri suddan 3,4 milliard rupiya (224 570 dollar) miqdorida tovon puli talab qilmoqda.
Jakartadagi sudda qatnashayotgan 36 yoshli Solihaning aytishicha, uning 3 yoshli qiziga siropni iste’mol qilganidan keyin o’tkir buyrak shikastlanishi tashxisi qo‘yilgan va bir necha kundan keyin vafot etgan. Ayol hukumatning javobgarlikka tortilishini istashini bildirgan.
“Agar qizim dorini iste’mol qilmaganida, balki yonimda bo‘larmidi. Umid qilamanki, preparat uchun javobgar bo‘lgan barcha mas’ullar siropdan vafot etgan va hali ham kasal bo‘lgan bolalar uchun javobgardir”, — deydi u.
Moliya vazirligi va da’vo arizasida ko‘rsatilgan beshta farmatsevtika kompaniyasi vakillari holat yuzasidan izoh berishdan bosh tortgan. Reuters nashri yana uchta kompaniya bilan bog‘lana olmagan.
Indoneziya hukumati bir qator yo‘tal siroplari iste’molini taqiqlab qo‘ygan va xavfli tarkibiy qismlar borligi aytilgan bir qancha farmatsevtika kompaniyalariga qarshi sudga da’vo arizasi bergan.
Gambiyada ham bolalar Hindiston farmatsevtika kompaniyasi tomonidan ishlab chiqilgan yo‘talga qarshi siropni iste’mol qilishi ortidan vafot etgan. Jahon sog‘liqni saqlash tashkiloti oktabr oyida bu bo‘yicha bayonot berib, ularda preparatdan so‘ng buyrak jarohati kuzatilganini qayd etgan.
Keyinchalik Hindiston sog‘liqni saqlash idoralari Nyu-Dehlida joylashgan Maiden Pharmaceuticals kompaniyasining yo‘tal va shamollashga qarshi siroplarini ishlab chiqarishni to‘xtatgan.
O‘zbekistondagi holat
O‘zbekistonda kamida 20 nafar bola Hindistonda ishlab chiqarilgan “Dok-1 Maks” siropini iste’mol qilish ortidan vafot etdi. Hozirda davlat xavfsizlik xizmati tomonidan “Dok-1 Maks” preparati bilan bog‘liq holat yuzasidan jinoyat ishi qo‘zg‘atilgan. Hindiston hukumati “Dok-1 Maks” dorisini ishlab chiqargan kompaniyaga qarshi ish ochgan. Kompaniyaning sirop ishlab chiqarilishi to‘xtatilgan. JSST “Dok-1 Maks” va “Ambronol” dorilari haqida ogohlantirgan. Hindiston hukumati “Dok-1 Maks” dorisini ishlab chiqaruvchi kompaniyaning litsenziyasini to‘xtatgan.
Izoh (0)