Fransiya poytaxti Parij shahrida 23-aprel kuni Uzbekistan‘s Club ijodiy jamoasi tomonidan tashkil etilgan “O‘zbekistonlik. Generating Ideas” (“O‘zbekistonlik. G‘oyalar yaratish”) xalqaro vatandoshlar forumi bo‘lib o‘tdi.
Forumda turli mamlakatlar va sohalarda xalqaro muvaffaqiyatlarga erishgan 200 dan ortiq o‘zbekistonlik vatandoshlar ishtirok etdi. Forumga O‘zbekistonning kreativ va media sohasining yetakchi vakillari ham keldi. Forumning asosiy mavzusi Orol dengizi mintaqasi va qurib borayotgan Orol dengizi bo‘ldi. Qoraqalpog‘iston Respublikasi Jo‘qorg‘i Kengesi bilan hamkorlikda “Aral Dream” ("Orol orzusi”) nodavlat notijorat tashkiloti “Salty Lives” (“Sho‘r hayot”) triptix loyihasini taqdim etdi. Unda Muxlisa Azizovaning qoraqalpog‘istonlik ayollar portretlari fotoko‘rgazmasi, rejissor Rustam Meliyevning yangi qisqa metrajli filmi va Orol dengizidan ilhomlangan O‘zbekistonning yetakchi dizaynerlari tomonidan yaratilgan kiyim modellari ko‘rgazmasi bo‘lib o‘tdi.
“Salty Lives” loyihasi maqsadi – butun dunyo eʼtiborini ilgari ommaviy axborot vositalarida va ommaviy madaniyatda yoritilmagan mavzuga jalb qilish: iqlim o‘zgarishi Orolbo‘yi ayollariga qanday taʼsir qilishi haqida gapirib berish. Parij bu maqsad uchun tasodifan tanlanmagan. Afsuski, jahon hamjamiyati 2015-yilda Parij iqlim kelishuvi tomonidan atmosferaga uglerod chiqindilarini kamaytirish bo‘yicha belgilangan maqsadlarni samarali amalga oshira olmadi. Shu bilan birga, Orol dengizi mintaqasi sayyoramizning iqlim o‘zgarishi taʼsiridan eng aziyat chekkan, zaif hududlaridan biridir.
Loyiha mualliflarining fikricha, rivojlangan sanoat davlatlari global isishning salbiy taʼsirini boshdan kechirayotgan odamlarga ko‘proq eʼtibor berishlari kerak.
Art-loyihaning birinchi qismida qoraqalpog‘istonlik ayollarning fotosuratlari-portretlari ko‘rgazmasi bo‘lib o‘tdi. Muallif Muxlisa Azizova va fotograf Rustam Meliyev turli yoshdagi ayollarni milliy qoraqalpoq kiyimida Barsakelmesning go‘zal sho‘r dalalarida suratga olishdi. Fotosuratlar rassom Abdurahmon Muxammadiyevning installyatsiyasida joylashtirilgan va baliq ovlash to‘rlari bilan bezatilgan. Portretlar qahramonlarning yoshini ko‘rsatadigan so‘zlar bilan to‘ldirilgan.
Loyihaning ikkinchi qismi-fotoko‘rgazma qahramonlari ishtirokida Rustam Meliyev va operator Jahongir Ibragimov tomonidan suratga olingan qisqa metrajli film. Filmning finalida Adham Abduraimovning mualliflik musiqasi bilan mahorat bilan uyg‘unlashgan qoraqalpoq onasining butun insoniyatga qaratilgan monologi yangraydi. Internetda filmning premyerasi 25-aprel kuni araldream.com. saytida bo‘lib o‘tadi.
Ko‘rgazmaning uchinchi qismini tashkil etish uchun O‘zbekistonning yetakchi dizayner va modelyerlari birlashdilar. Forumda Orol dengizidan ilhomlangan kiyim modellari to‘plami namoyish etildi. Uni yaratishda Dilnoza Umrzokovaning Anor, Lali Fazilovaning Lali, Zuxra Inatning Moel Bosh, Nilufar Abduvaliyevning Mursak, Sarvinoz Anvarovaning Art ansar moda uylari modellari, shuningdek, dizaynerlar Nigora Hoshimova va Zulfiya Sulton ishtirok etdi.
To‘plam Parijga Barsakelmes sho‘r botqog‘idan olib kelingan tuz yordamida yaratilgan maxsus installyatsiyada taqdim yetildi. Installyatsiya muallifi — Saidazim Fazilov.
Aral Dream (Orol orzusi) Nodavlat notijorat tashkilotining asosiy vazifasi Jahon hamjamiyati eʼtiborini Orol dengizi ekologik fojiasiga, Orolbo‘yi mintaqasi va Qoraqalpog‘iston aholisiga jalb etishdan iborat.
Aral Dream tashkiloti asoschilarining fikricha, bugun dunyo bu fojiani unutgan va shu bois Orol mavzusini jahon ommaviy axborot vositalari va ommaviy madaniyat kun tartibiga olib chiqish uchun astoydil harakat qilmoqda.
Tashkilotning yana bir muhim maqsadi — mintaqada inson salohiyatini, birinchi navbatda kreativ industriyalarni, yaʼni ijodiy sohalarni rivojlantirishdir. Tashkilotning loyihalari va jamoasi haqida ko‘proq maʼlumotni “araldream.com” saytidan olishingiz mumkin.
2021-yilda Aral Dream jamoasi Jenisbek Piyazov va ELEKTROOKO guruhi ishtirokida “Ertangi kun” klipini yaratdi, unda Orol dengizi kompyuter texnologiyalari yordamida qaytgan edi. 2022-yilda esa u Berlinda mashhur aktyor Erkin Bozorov ishtirokidagi “Sho‘rxok” filmini taqdim yetdi.
Film Amerika kinofestivallarida ikkita mukofotga sazovor bo‘ldi. Ikkala videoni ham Aral Dream YouTube kanalida ko‘rishingiz mumkin.
Izoh (0)