Франция пойтахти Париж шаҳрида 23 апрель куни Uzbekistan’s Club ижодий жамоаси томонидан ташкил этилган “Ўзбекистонлик. Generating Ideas” (“Ўзбекистонлик. Ғоялар яратиш”) халқаро ватандошлар форуми бўлиб ўтди.
Форумда турли мамлакатлар ва соҳаларда халқаро муваффақиятларга эришган 200 дан ортиқ ўзбекистонлик ватандошлар иштирок этди. Форумга Ўзбекистоннинг креатив ва медиа соҳасининг етакчи вакиллари ҳам келди. Форумнинг асосий мавзуси Орол денгизи минтақаси ва қуриб бораётган Орол денгизи бўлди. Қорақалпоғистон Республикаси Жўқорғи Кенгеси билан ҳамкорликда “Aral Dream” ("Орол орзуси”) нодавлат нотижорат ташкилоти “Salty Lives” (“Шўр ҳаёт”) триптих лойиҳасини тақдим этди. Унда Мухлиса Азизованинг қорақалпоғистонлик аёллар портретлари фотокўргазмаси, режиссёр Рустам Мелиевнинг янги қисқа метражли фильми ва Орол денгизидан илҳомланган Ўзбекистоннинг етакчи дизайнерлари томонидан яратилган кийим моделлари кўргазмаси бўлиб ўтди.
“Salty Lives” лойиҳаси мақсади – бутун дунё эътиборини илгари оммавий ахборот воситаларида ва оммавий маданиятда ёритилмаган мавзуга жалб қилиш: иқлим ўзгариши Оролбўйи аёлларига қандай таъсир қилиши ҳақида гапириб бериш. Париж бу мақсад учун тасодифан танланмаган. Афсуски, жаҳон ҳамжамияти 2015 йилда Париж иқлим келишуви томонидан атмосферага углерод чиқиндиларини камайтириш бўйича белгиланган мақсадларни самарали амалга ошира олмади. Шу билан бирга, Орол денгизи минтақаси сайёрамизнинг иқлим ўзгариши таъсиридан энг азият чеккан, заиф ҳудудларидан биридир.
Лойиҳа муаллифларининг фикрича, ривожланган саноат давлатлари глобал исишнинг салбий таъсирини бошдан кечираётган одамларга кўпроқ эътибор беришлари керак.
Арт-лойиҳанинг биринчи қисмида қорақалпоғистонлик аёлларнинг фотосуратлари-портретлари кўргазмаси бўлиб ўтди. Муаллиф Мухлиса Азизова ва фотограф Рустам Мелиев турли ёшдаги аёлларни миллий қорақалпоқ кийимида Барсакелмеснинг гўзал шўр далаларида суратга олишди. Фотосуратлар рассом Абдураҳмон Мухаммадиевнинг инсталляциясида жойлаштирилган ва балиқ овлаш тўрлари билан безатилган. Портретлар қаҳрамонларнинг ёшини кўрсатадиган сўзлар билан тўлдирилган.
Лойиҳанинг иккинчи қисми-фотокўргазма қаҳрамонлари иштирокида Рустам Мелиев ва оператор Жаҳонгир Ибрагимов томонидан суратга олинган қисқа метражли фильм. Фильмнинг финалида Адҳам Абдураимовнинг муаллифлик мусиқаси билан маҳорат билан уйғунлашган қорақалпоқ онасининг бутун инсониятга қаратилган монологи янграйди. Интернетда фильм премьераси 25 апрель куни “araldream.com” сайтида бўлиб ўтади.
Кўргазманинг учинчи қисмини ташкил этиш учун Ўзбекистоннинг етакчи дизайнер ва моделерлари бирлашдилар. Forumда Орол денгизидан илҳомланган кийим моделлари тўплами намойиш этилди. Уни яратишда Дилноза Умрзокованинг Anor, Лали Фазилованинг Lali, Зухра Инатнинг Моel Bosh, Нилуфар Абдувалиевнинг Мursak, Сарвиноз Анварованинг Аrt ansor мода уйлари моделлари, шунингдек, дизайнерлар Нигора Ҳошимова ва Зулфия Султон иштирок этди.
Тўплам Парижга Барсакелмес шўр ботқоғидан олиб келинган туз ёрдамида яратилган махсус инсталляцияда тақдим етилди. Инсталляция муаллифи — Саидазим Фазилов.
Aral Dream (Орол орзуси) Нодавлат нотижорат ташкилотининг асосий вазифаси Жаҳон ҳамжамияти эътиборини Орол денгизи экологик фожиасига, Оролбўйи минтақаси ва Қорақалпоғистон аҳолисига жалб этишдан иборат.
Aral Dream ташкилоти асосчиларининг фикрича, бугун дунё бу фожиани унутган ва шу боис Орол мавзусини жаҳон оммавий ахборот воситалари ва оммавий маданият кун тартибига олиб чиқиш учун астойдил ҳаракат қилмоқда.
Ташкилотнинг яна бир муҳим мақсади — минтақада инсон салоҳиятини, биринчи навбатда креатив индустрияларни, яъни ижодий соҳаларни ривожлантиришдир. Ташкилотнинг лойиҳалари ва жамоаси ҳақида кўпроқ маълумотни “аралдреам.cом” сайтидан олишингиз мумкин.
2021 йилда Aral Dream жамоаси Женисбек Пиязов ва ELЕКТRООКО гуруҳи иштирокида “Эртанги кун” клипини яратди, унда Орол денгизи компьютер технологиялари ёрдамида қайтган эди. 2022 йилда эса у Берлинда машҳур актёр Эркин Бозоров иштирокидаги “Шўрхок” фильмини тақдим етди.
Фильм Америка кинофестивалларида иккита мукофотга сазовор бўлди. Иккала видеони ҳам Aral Dream YouTube каналида кўришингиз мумкин.
Изоҳ (0)