Sal avvalroq tarmoqlarda odamlarning Open budget’ga ovoz yig‘ib, bitta ovozga bitta Pepsi, besh ming so‘m pul yoki bir yarim kilo olma vaʼda qilgani yoxud uchta ovoz uchun bir tovuq berishga roziligi aytilgan videolar tarqalgandi. Bugun esa tarmoqlarni shunday mashaqqatlar evaziga qo‘lga kiritilgan mablag‘ samarasiz sarflanayotgani aytilgan videolar to‘ldirmoqda. Jumladan, Qashqadaryo viloyatining Yakkabog‘ tumanida yashovchi aholi vakillari “Daryo”ga murojaat qilib, odamlarning ne-ne mashaqqatlari evaziga qo‘lga kiritilgan mablag‘lar behuda sovurilayotganini aytdi. “Daryo” bugun mazkur mavzu atrofida so‘z yuritadi.
Yakkabog‘ tumanining Bexo‘ja qishlog‘ida yashovchi aholi vakillari asfalt yotqizish ishlari sifatsiz bajarilayotganini, buni masʼullar nazorat qilmayotganini aytmoqda.
“Asfalt juda yupqa yotqizilmoqda. Biz bundan norozi bo‘lib, ishlar sifatli bo‘lishini talab qilyapmiz. Ammo ish bajaruvchi tashkilotning nomi yo‘q, so‘rasak, aytishmaydi”, — deydi aholi vakillaridan biri.
Murojaatchilarning aytishicha, loyihada asfaltning qalinligi 6,5 sm bo‘lishi ko‘rsatilgani, tekislanib, tayyor holatga kelgach esa 5 sm bo‘lishi kerakligi, ayni paytda esa asfalt 1,5—2 sm qalinlikda yotqizilayotgani bildirilmoqda.
“Open budget’ning pulini qo‘lga kiritish uchun aholi yugurgandir. Ammo bu pullar ham davlatning, xalqning puli-ku. Ishni bunaqa holatda bajarish pulni ko‘chaga sovurish-ku. Buni nazorat qiluvchi tashkilotlar bormi?”, — deydi videodagi yana bir suhbatdosh.
Bu holatga eʼtibor qaratgan Yakkabog‘ tumani hokimligi Yakkabog‘ tumanining “Qishliq” MFY Bexo‘ja qishlog‘idagi ichki yo‘lning 2,2 km qismi “Ochiq budjet” dasturi orqali asfaltlashtirilayotganini tasdiqlab, ushbu ishlarni tenderda g‘olib bo‘lgan “Asbob Servis jihozlari” MCHJ masʼullari bajarayotganiga aniqlik kiritgan.
Taʼkidlanishicha, ayni kunga qadar qishloqning 2,1 kilometr yo‘li asfaltlashtirib bo‘lingan.
“Asfaltlashtirish ishlari davomida asfalt quyish maxsus texnikasi nosoz holga kelib qolgani sababli texnika ichida qolgan asfalt mahsuloti qotib qolishining oldini olish maqsadida asfalt qo‘l kuchi yordamida yo‘lga yoyib olingan. Asfalt quyish maxsus texnikasi soz holatga keltirilgach, qolgan 140 metr yo‘lda ham norma bo‘yicha ishlar davom ettiriladi”, — deyiladi hokimlikning mazkur muammo yuzasidan fikr bildirgan munosabatida.
Aholining tarmoqlarda tarqatayotgan videosida qishloqdagi asfaltlashtirish ishlari sifatsiz bajarilgani bot-bot aytilgan bo‘lsa-da, mazkur yo‘l taʼmiriga masʼul tashkilot — tuman Obodonlashtirish boshqarmasi boshlig‘i Safar Suyunov yo‘l taʼmiri sifati ko‘ngildagidek ekanini aytmoqda. Uning qo‘shimcha qilishicha, asfalt yotqizilgan 2,1 km yo‘lning 2 kilometridagi ishlar sifatli bajarilgan, so‘nggi 100 metrdagi asfaltlashtirish sifatsiz bo‘lgani bois qayta qilinadi.
“Odamlarga ozgina bahona kerak. Ular asfaltlashtirish ishlari sifatsiz bajarilganini aytib, video tarqatishgach, voqea joyiga bordim. 2,1 kilometr yo‘lning 2 kilometridagi asfaltlashtirish ishlari sifatli bajarilgan. To‘g‘ri, keyingi 100 metrdagi asfalt juda yupqa holatda bo‘lgan. Shu bois tadbirkor bilan gaplashib, keyingi 100 metrni qayta qilishga kelishib oldik. Bu masalada hech qanday muammo bo‘lmaydi”, — deydi Safar Suyunov.
Viloyatning Shahrisabz tumani “Sayyod” MFYda yashovchi aholi vakillari prezidentning 408-sonli qaroriga ko‘ra taʼmirlanayotgan yo‘l ham sifatsiz taʼmirlanayotganini aytib, shikoyat qilmoqda.
.jpg)
“Mol yursa, oyog‘i toshga teguvchi asfaltni nazorat qiluvchi tashkilotlar yo‘qmi? Asfaltlashtirishda standart bo‘ladi-ku, yo‘lning ahvoli juda achinarli-ku”, — deydi yo‘lning sifatsizligidan shikoyat qilgan video muallifi.
Shahrisabz tumani hokimligi axborot xizmatining jamoatchilikka maʼlumot berishicha, prezidentning 408-sonli qarori bilan tumanning “Sayyod” MFY hududidagi 4,42 kilometr ichki yo‘l taʼmirlanmoqda.
“Endi mahallaning uch kilometridan ziyod qismiga asfalt, bir kilometr qismiga esa beton qoplamalari yotqiziladi. Ushbu qurilish ishlari uchun 2 milliard 650 million so‘m mablag‘ yo‘naltirilgan”, — deydi hokimlik masʼullari.
“Daryo” voqealar rivojini kuzatishda davom etadi.
Izoh (0)